Міністэрства антыманапольнага рэгулявання і гандлю прапануе абмеркаваць папраўкі ў законы па пытаннях гандлю і грамадскага харчавання. 

Сярод прапануемых змяненняў - адмена абавязку суб`ектаў гаспадарання, якія маюць намер займацца гандлем і грамадскім харчаваннем, пісьмова паведамляць аб гэтым мясцоваму выканаўчаму і распарадчаму органу.

"Такім чынам, юрыдычныя асобы і ІП будуць мець права пачаць без паведамлення дзейнасць у сферы грамадскага харчавання, рознічны і аптовы гандаль (за выключэннем тавараў, абарот якіх абмежаваны або якія патрабуюць ліцэнзіі). Пры гэтым для іх захоўваецца абавязак не пазней за пяць каляндарных дзён з даты пачатку гандлю (у тым ліку без гандлёвага аб`екта) або дзейнасці ў сферы грамадскага харчавання, работы гандлёвага цэнтра, рынку, інтэрнэт-магазіна прадставіць у мясцовы выканаўчы і распарадчы орган звесткі для ўключэння ў гандлёвы рэестр Беларусі", - адзначылі ў МАРГ.

Таксама законапраектам прадугледжана адмена неабходнасці ўзгаднення з мясцовымі ўладамі рэжыму работы пасля 23.00 і да 7.00 гандлёвых цэнтраў, рынкаў, гандлёвых аб`ектаў і аб`ектаў грамадскага харчавання, за выключэннем тых, у якіх гандлююць алкаголем, слабаалкагольнымі напіткамі і півам. Акрамя таго, прапануецца адмяніць шэраг патрабаванняў да сетак грамадскага харчавання.

Законапраектам прадугледжана стварэнне дадатковых умоў для дасягнення індыкатараў, устаноўленых дактрынай нацыянальнай харчовай бяспекі Беларусі да 2030 года, і забеспячэння нацыянальнай бяспекі ў цэлым. Так, прапануецца ўстанавіць абавязак суб`ектаў рознічнага гандлю забяспечыць мінімальную долю продажу асобных харчовых і нехарчовых тавараў айчыннай вытворчасці ў агульным аб`ёме, а таксама прырост долі беларускіх харчовых тавараў у аб`ёме рознічнага тавараабароту (калі такая доля за папярэдні год склала менш за 85 працэнтаў). Прадугледжваецца, што такія патрабаванні не закрануць ІП, мікраарганізаці, фермераў, фірменныя магазіны, а таксама суб`ектаў, якія гандлююць выключна таварамі, патрэбнасць унутранага рынку ў якіх задавольваецца беларускай прадукцыяй на 50 працэнтаў і менш (напрыклад, арэхі, чай, кава, рыба, рыс і іншыя). Савет Міністраў будзе ўстанаўліваць пералікі такіх тавараў і значэння паказчыкаў у адпаведныя перыяды часу.

"Мяркуецца, што гэтыя меры да 2030 года дазволяць дабіцца зніжэння долі харчовых тавараў замежнай вытворчасці ў аб`ёме продажаў арганізацый гандлю на ўнутраным рынку да 14 працэнтаў, а таксама дадуць магчымасць істотна знізіць долю продажу нехарчовых тавараў замежнай вытворчасці", - заявілі ў МАРГ.

Дадатковыя ўмовы прадугледжаны і для развіцця рознічнага гандлю з выкарыстаннем інтэрнэту. "Прапануецца пашырыць пералік тэхналогій, з дапамогай якіх суб`екты могуць гандляваць з выкарыстаннем інтэрнэту. Дыстанцыйны гандаль можна будзе весці не толькі праз інтэрнэт-магазін, але і з выкарыстаннем іншых інфармацыйных сетак, сістэм і рэсурсаў (інтэрнэт-пляцоўкі, дадаткі для мабільных устройстваў і іншыя)", - растлумачылі ў ведамстве.

Прапануецца таксама шэраг мер для развіцця айчыннай вытворчасці і забеспячэння спажывецкага рынку якаснымі харчовымі таварамі, малога і сярэдняга бізнесу і арганізацый спажывецкай кааперацыі.

16 жніўня 2022, Мінск
БЕЛТА