На 1 студзеня 2020 года ў карыстанні сялянскіх (фермерскіх) гаспадарак знаходзілася 213,9 тыс. га сельскагаспадарчых угоддзяў, у тым ліку ворных - 150,7 тыс. га. У параўнанні з 2010 годам сельгасземлі, што займаюць фермерскія гаспадаркі, павялічыліся на 85,5 працэнта, ворныя - на 76,5 працэнта. У сярэднім на адну гаспадарку прыпадае 79 га сельгасзямель.

На працягу апошніх гадоў фермерскія гаспадаркі па тэмпах росту вытворчасці сельскагаспадарчай прадукцыі значна апярэджвалі сельгасарганізацыі. Аб`ём вытворчасці прадукцыі сельскай гаспадаркі ў С(Ф)Г у 2019 годзе ў параўнанні з 2010 годам павялічыўся ў супастаўных цэнах у 3,1 раза, у тым ліку прадукцыі раслінаводства - у 3,5 раза, жывёлагадоўлі - на 47,5 працэнта.

Узрасла і доля фермерскіх гаспадарак у агульным аб`ёме вытворчасці сельгаспрадукцыі. У 2019 годзе яна склала 2,7 працэнта (у 2010 годзе - 1 працэнт): у вытворчасці прадукцыі раслінаводства павялічылася з 1,6 працэнта да 5,4 працэнта, жывёлагадоўлі - з 0,3 працэнта да 0,4 працэнта.

Асноўным напрамкам сельскагаспадарчай дзейнасці большасці (звыш 70 працэнтаў) сялянскіх (фермерскіх) гаспадарак з`яўляецца раслінаводства. На яго долю прыпадае больш за 90 працэнтаў вырабляемай фермерамі прадукцыі.

Маючы 2,5 працэнта ад агульнай плошчы сельгасзямель у рэспубліцы, фермерскія гаспадаркі ў 2019 годзе атрымлівалі 20,5 працэнта агульнарэспубліканскага аб`ёму агародніны, 7,3 працэнта бульбы, 2,7 працэнта збожжа, 2,5 працэнта цукровых буракоў. Пры гэтым доля фермерскага сектара ў вытворчасці агародніны ў параўнанні з 2010 годам павялічылася ў 3,4 раза, бульбы - у 3,7 раза, збожжа - у 1,9 раза, цукровых буракоў - у 1,8 раза.

У агульным аб`ёме вытворчасці прадукцыі жывёлагадоўлі на долю фермерскіх гаспадарак прыпадае нязначная частка. Так, у 2019 годзе іх удзельная вага ў рэалізацыі жывёлы і птушкі на забой у рэспубліцы склала 0,7 працэнта, малака - 0,4 працэнта. Больш важкі ўклад фермерскіх гаспадарак у вытворчасць воўны - 13,6 працэнта.

Узрос экспартны патэнцыял сялянскіх (фермерскіх) гаспадарак. У 2019 годзе экспарт прадукцыі склаў $66,9 млн (у 2014 годзе - $55,5 млн). Фермерскія гаспадаркі экспартавалі 127,7 тыс. т бульбы (у 10,1 раза больш, чым у 2014 годзе), 5,3 тыс. т капусты (на 20,6 працэнта больш), 2,2 тыс. т цыбулі і часнаку (у 12,3 раза больш), 15,9 тыс. т яблыкаў і груш (у 3,6 раза больш).

8 чэрвеня 2020, Мінск
БЕЛТА