Стаўка рэфінансавання ў Беларусі на канец года можа скласці 9%, лічаць эксперты Еўразійскага банка развіцця (ЕАБР).

У аглядзе адзначаецца, што Нацбанк Беларусі працягвае змякчэнне манетарнай палітыкі, як раней і прагназіраваў ЕАБР. Нагадаем, што ў 2023 годзе рэгулятар ужо шэсць разоў мяняў стаўку рэфінансавання. Так часта рашэнні не прымаліся з 2017 года. З пачатку гэтага года стаўка зменшана з 12% да 9,75%, а з 28 чэрвеня яна стала 9,5%.

"Мы ацэньваем стаўку рэфінансавання каля 9-9,5% на канец года", - адзначаюць аналітыкі ЕАБР.

Звярнулі яны ўвагу і на тое, што гадавы тэмп інфляцыі знізіўся да 3,7% у маі. На думку экспертаў, індэкс спажывецкіх цэн і надалей будзе зніжацца.

"Гадавы паказчык можа апусціцца ніжэй за 3%", - прагназіруе ЕАБР.

Але потым аналітыкі чакаюць рост рызык інфляцыі з-за ўзмацнення попыту на ўнутраным рынку і павелічэння крэдытавання. Таксама яны адзначаюць, што ў Беларусі паскорыўся эканамічны рост. Пра гэта кажа таксама рост ВУП на 0,9% у студзені – маі.

"Прагназіруем рост эканомікі Беларусі на 2,2% па выніках 2023 года", - адзначаюць эксперты.

Нацбанк тлумачыць паніжэнне стаўкі тым, што ў краіне запавольваецца інфляцыя. Рэгулятар не адмаўляе, што ёсць інфляцыйныя рызыкі, ацэньваючы іх як умераныя.

На фоне рашэнняў Нацбанка аб зніжэнні стаўкі працэнты па крэдытах таксама становяцца ніжэйшымі, роўна як і па ўкладах. Сярэдняя стаўка па крэдытах зменшылася да 9,9%. Па рахунках у расійскіх рублях у сярэднім назіраецца 6,25% гадавых, а па беларускіх – 9,63%, што вышэй за ўзровень інфляцыі.

Мінск, 2 ліпеня 2023
Sputnik