Дырэктар Нацыянальнага агенцтва інвестыцый і прыватызацыі Дзмітрый Клеўжыц заклікаў нямецкіх бізнесменаў браць удзел у рэалізацыі праекта кітайска-беларускага індустрыяльнага парку.
10 кастрычніка ў Мінску на Дні нямецкай эканомікі ў Беларусі ён заявіў, што стварэнне індустрыяльнага парку — "вельмі важны элемент для прыцягнення інвестараў". "Гэта не азначае, што ў парку будуць працаваць толькі кітайскія і беларускія кампаніі, мы рады будзем бачыць любога інвестара з Германіі, іншых краін", — сказаў ён. Клеўжыц прывёў прыклад паркаў у Кітаі, дзе працуюць кампаніі з усяго свету, у тым ліку з Японіі, Германіі, Карэі. "Я ўпэўнены, што ў будучыні і ў кітайска-беларускім парку мы ўбачым найбуйнейшыя кампаніі і прадстаўнікоў малога бізнесу Германіі", — зазначыў кіраўнік агенцтва.
Сярод перавагаў інвестыцый у Беларусь ён назваў высокі інтэлектуальны ўзровень мясцовых спецыялістаў і экспертаў, іх хуткую навучальнасць. Сферамі беларускай эканомікі, куды могуць прыйсці інвестары, з`яўляюцца IT, фармацыя і біятэхналогіі, аднаўляная энергетыка і новыя матэрыялы, перапрацоўчая прамысловасць і вытворчасць аўтакампанентаў.
Клеўжыц паведаміў пра сумесны з Сусветным банкам праект прыватызацыі васьмі беларускіх прадпрыемстваў і выказаў надзею, што ў наступным годзе яны знойдуць сваіх стратэгічных інвестараў.
Марына Носава,
БелаПАНМінск, 10 кастрычніка 2012
