Беларусь папярэдзіла Антыкрызісны фонд (АКФ) ЕўрАзЭС пра зніжэнне сваіх золатавалютных рэзерваў блізу 1 кастрычніка 2012 года. Пра гэта гаворыцца ў лісце пра намеры ўрада і Нацбанка Беларусі на адрас АКФ, якое ўлады просяць разглядаць як аснову для прыняцця рашэнняў аб выдзяленні фондам 4-га і 5-га траншаў стабілізацыйнага крэдыту.

"З улікам неабходнасці своечасовага пагашэння Рэспублікай Беларусь унутраных і знешніх абавязацельстваў у замежнай валюце ўзровень золатавалютных рэзерваў (ЗВР) дзяржавы на 1 кастрычніка 2012 года складзе не менш як 1,6 месяца імпарту і на 1 студзеня 2013 года — не менш як 2 месяцы імпарту", — гаворыцца ў лісце.

У ім адзначаецца, што на 1 лютага аб`ём ЗВР складаў 7,98 млрд. долараў, што адпавядае ўзроўню двухмесячнага імпарту. Такім чынам, 1,6 месяца імпарту адпавядаюць 6,4 млрд. ЗВР.

У мэтах збалансаванага развіцця эканомікі Нацыянальны банк і ўрад "працягнуць павышэнне золатавалютных рэзерваў дзяржавы да ўзроўню, што забяспечвае эканамічную бяспеку краіны", падкрэсліваецца ў лісце. Гэта будзе дасягнута як праз прыцягненне прамых замежных інвестыцый, так і акумуляванне прыватызацыйных даходаў у аб`ёмах, узгодненых у межах праграмы, што падтрымліваецца крэдытам АКФ.

Таксама ўлады заяўляюць, што Нацбанк прадоўжыць курсавую палітыку ў рэжыме "кіраванага плавання". Абменны курс беларускага рубля будзе фарміравацца пры "мінімальным непасрэдным удзеле Нацбанка, зыходзячы з попыту і прапановы замежнай валюты пад уздзеяннем фундаментальных макраэканамічных фактараў", адзначаецца ў лісце. Валютныя інтэрвенцыі "будуць скіраваны выключна на згладжванне рэзкіх ваганняў абменнага курсу".

Улады бяруць абавязак ажыццяўляць крэдытную эмісію на рынкавых умовах і на кароткія тэрміны з выкарыстаннем стандартных інструментаў рэгулявання ліквіднасці банкаў. Прагназуецца, што прырост агульнага аб`ёму крэдытаў банкаў эканоміцы не перавысіць 12% на 1 кастрычніка 2012 года і 15% на 1 студзеня 2013 года.

У выпадку прыцягнення банкамі рэсурсаў, звыш прадугледжаных прагнозам плацежнага балансу 250 млн. долараў ЗША на чыстай аснове для фінансавання звязаных праектаў, "прырост крэдытаў банкаў эканоміцы можа быць скарэктаваны на адпаведную велічыню пасля ўзгаднення з кіраўніком сродкамі АКФ", падкрэсліваецца ў лісце.

Андрэй Кажамякін, БелаПАН
Мінск, 2 жніўня 2012