Плошча паўночнага актыву "Беларуснафты" - нафтавай кампаніі "Янгпур" павялічылася на 101,5 кв.км. У арганізацыі цяпер яшчэ адзін ліцэнзійны ўчастак - Янг`яхінскі ў Пураўскім раёне Ямала-Ненецкай аўтаномнай акругі. 

"Янгпур" атрымаў права на карыстанне нетрамі ліцэнзійнага ўчастка на конкурснай аснове, выйграўшы аўкцыён.

Новы актыў знаходзіцца на адлегласці 38 км ад межаў Усць-Пурпейскага ўчастка, дзе беларускія нафтавікі вядуць здабычу на чатырох радовішчах і дзе ёсць камунікацыі. "Гэта аблегчыць інтэграцыю новых плошчаў у структуру "Янгпура", - лічаць на прадпрыемстве.

"Як адлюстравана ў Дзяржаўным балансе запасаў вуглевадароднай сыравіны Расійскай Федэрацыі, па стане на 1 студзеня 2021 года, у межах набытага нашай кампаніяй участка нетраў размешчана структура Янг`яхінская, падрыхтаваная да пошукавага бурэння, з сумарнымі здабываемымі рэсурсамі нафты катэгорыі D0 1,357 млн т. Галоўнымі мэтамі пошукава-ацэначнага этапу з`яўляюцца пошукавае бурэнне, адкрыццё радовішчаў і залежаў вуглевадародаў, ацэнка іх запасаў, разведка радовішчаў і ўвод іх у распрацоўку", - расказаў вядучы геолаг геалагічнага аддзела ААТ "НК "Янгпур" Віталь Нярэзька.

На прадпрыемстве падкрэслілі: ёсць усе перадумовы лічыць участак перспектыўным. Побач з ім размешчаны дзеючыя радовішча буйных расійскіх кампаній. На поўдні Янг`яхінскі ліцэнзійны ўчастак мяжуе з Паўночна-Губкінскім, у межах якога адкрыта Паўночна-Губкінскае нафтагазакандэнсатнае радовішча. На захадзе размешчаны Ямсавейская і Ярэйская плошчы, на паўднёвым захадзе - Паўночна - Камсамольская. У кампаніі адзначаюць, што набыццё новага ліцэнзійнага ўчастка - сур`ёзны зачын на будучыню, які вызначыць аб`ёмы ў геолагаразведцы на гады наперад, а ў здабычы вуглевадародаў - на дзесяцігоддзі. Для "Беларуснафты" - гэта яшчэ адзін крок на шляху павелічэння здабычы нафты і газу ў Расіі.

ААТ "Нафтавая кампанія "Янгпур" з 2013 года прадстаўляе "Беларуснафту" на расійскім рынку здабычы нафты і газу. Сярод асноўных відаў дзейнасці ААТ - здабыча нафты, газу, газавага кандэнсату, першасная перапрацоўка нафты, пастаўка вуглевадароднай сыравіны і прадуктаў яе перапрацоўкі прадпрыемствам Расіі і іншых краін.

12 кастрычніка 2022, Гомель
БЕЛТА