"Deutsche Bank не вядзе бізнес з Беларуссю і не мае ніякіх планаў па яго працягу", — заявіў прадстаўнік гэтага нямецкага банка Крыстаф Блюменталь, адмовіўшыся каментаваць прычыны такога рашэння.
Супрацоўніцтва з беларускім урадам таксама спыніў французскі банк BNP Paribas, паведаміла брытанская газета The Independent (адзін з офісаў BNP Paribas размешчаны ў Лондане). Атрымаць каментарый у гэтага банка пакуль не ўдалося, але інфармацыю пацвердзіў БелаПАН прадстаўнік брытанскай праваабарончай арганізацыі Index on Censorship Майк Харыс.
"Мы рады такому рашэнню, бо мы праводзілі скіраваную на гэта кампанію", — сказаў ён. У рамках кампаніі Index on Censorship звярталася да ўрада Вялікабрытаніі. Праваабаронца таксама нагадаў, што некалькімі месяцамі раней супрацоўніцтва з Беларуссю спыніў брытанскі Royal Bank of Scotland.
Deutsche Bank і BNP Paribas разам з брытанскім Royal Bank of Scotland і расійскім "Ашчадбанкам" выступалі арганізатарамі размяшчэння беларускіх еўрааблігацый. "Спадзяемся, што цяпер супрацоўніцтва з беларускім урадам спыніць і расійскі "Ашчадбанк". Урэшце рэшт яны гэта зробяць", — мяркуе Харыс.
Праваабаронца заявіў, што Index on Censorship будзе працягваць аказваць націск на Deutsche Bank, які па-ранейшаму мае намер інвеставаць у беларускія дзяржпрадпрыемствы — напрыклад у "Беларуськалій".
Антон Тарас,
БелаПАНМінск, 26 кастрычніка 2011
