Дагавор аб зоне свабоднага гандлю СНД падпісаны 18 кастрычніка ў Санкт-Пецярбургу паводле вынікаў пасяджэння Савета кіраўнікоў урадаў краін Садружнасці.
"У выніку доўгіх, вострых, але ўсё-такі канструктыўных перамоў мы прыйшлі да вырашэння галоўнага пытання, дзеля якога мы сёння сабраліся. Мы дамовіліся пра падпісанне сёння дагавора аб зоне свабоднага гандлю ў СНД", — цытуе РІА Новости прэм`ер-міністра Расіі Уладзіміра Пуціна.
Паводле яго слоў, размова ідзе пра стварэнне новага падмурку гандлёва-эканамічных адносінаў у межах Садружнасці.
"Гэта фундаментальны дакумент, які будзе ляжаць у аснове адносінаў на доўгую перспектыву", — сказаў Пуцін.
Ён адзначыў, што яшчэ ў 1994 годзе краіны СНД падпісалі дагавор аб стварэнні зоны свабоднага гандлю, аднак той дакумент не быў ратыфікаваны многімі дзяржавамі, у тым ліку Расіяй. Праца над новым дакументам вялася амаль дзесяць гадоў, а з 2009 года ішла ў інтэнсіўным рэжыме, вынік дасягнуты дзякуючы кваліфікаванай экспертнай рабоце, адзначыў прэм`ер-міністр РФ.
"Сёння можна меркаваць, як і якімі тэмпамі рос бы наш тавараабарот, калі б такая зона свабоднага гандлю ў нас працавала", — заявіў Пуцін.
Паводле яго слоў, вынік доўгіх дыскусій у аўторак стаў нечаканым. "Мы дамовіліся, узгаднілі, паправілі тэкст і ўзгаднілі яго канчаткова", — сказаў кіраўнік расійскага ўрада.
Дагавор прадугледжвае спрашчэнне прававых асноў гандлёва-эканамічных адносінаў паміж краінамі, якія яго падпішуць, замену шэрагу шматбаковых і прыблізна 100 двухбаковых дакументаў, якія рэгламентуюць сёння рэжым свабоднага гандлю на прасторы Садружнасці.
Былі таксама падпісаны пагадненне аб асноўных прынцыпах палітыкі ў галіне валютнага рэгулявання і валютнага кантролю ў краінах СНД і рашэнне аб канцэпцыі стратэгічнага развіцця чыгуначнага транспарту дзяржаў Садружнасці да 2020 года. Усяго ў Санкт-Пецярбургу падпісана 28 дакументаў.
БелаПАНМінск, 18 кастрычніка 2011
