Беларусь і Расія падчас міністэрскай канферэнцыі ў МАГАТЭ, прысвечанай падзеям на японскай АЭС "Фукусіма", правядуць чарговыя рабочыя кансультацыі па праекце будаўніцтва ў Беларусі атамнай станцыі па расійскім праекце, паведаміў намеснік міністра энергетыкі Беларусі Міхаіл Міхадзюк. Канферэнцыя адкрываецца 20 чэрвеня ў Вене (Аўстрыя).
"Мы працуем над кантрактным пагадненнем, асноватворныя матэрыялы якога потым больш падрабязна будуць развітыя ў генеральным кантракце. Асноўныя параметры мы ўзгаднілі і цяпер працуем над цэнавымі параметрамі. Рабочыя кансультацыі (па гэтым пытанні) будуць ісці і сёння", — сказаў ён.
Міхадзюк нагадаў, што генпадрадчыкам атамнай станцыі будзе расійскае ЗАТ "Атамбудэкспарт", а праектаваць АЭС стане пецярбургскі інстытут "Атамэнергапраект".
"Наша станцыя будзе аналагам Балтыйскай АЭС, лічыцца, што на сёння ў свеце гэта самы апрабаваны праект", — адзначыў Міхадзюк.
Як заявіў 17 чэрвеня на прэс-канферэнцыі ў Мінску прэзідэнт Беларусі Аляксандр Лукашэнка, беларуская АЭС абыдзецца краіне ў 7 млрд. долараў, а яе інфраструктура — яшчэ ў 2 млрд. долараў.
У пачатку чэрвеня першы віцэ-прэм`ер Беларусі Уладзімір Сямашка заявіў, што ў ліпені плануецца падпісаць беларуска-расійскае крэдытнае пагадненне па будаўніцтве АЭС.
У лютым гэтага года Сямашка заяўляў, што Беларусь просіць крэдыт у Расіі на будаўніцтва АЭС тэрмінам на 25 гадоў і спадзяецца атрымаць дзяржаўны крэдыт у 9 млрд. долараў. Крэдыт разлічаны на будаўніцтва як самой АЭС, так і інфраструктуры. Віцэ-прэм`ер таксама паведаміў, што адтэрміноўка плацяжоў па крэдыце будзе прадстаўлена да моманту пабудовы АЭС, гэта значыць да 2016 года.
Андрэй Кажамякін,
БелаПАНМінск, 20 чэрвеня 2011
