У камерцыйных арганізацыях наймальнікі маюць права самастойна на аснове лакальных прававых актаў устанаўліваць работнікам, уключаючы маладых спецыялістаў, любыя сістэмы аплаты працы. Яны могуць вызначаць складнікі зарплаты, у тым ліку стымулюючыя выплаты, і іх памеры з улікам фінансавых магчымасцей, спецыфікі і асаблівасцей эканамічнай дзейнасці арганізацыі, вынікаў працы канкрэтных работнікаў.

У аграпрамысловым комплексе маладым спецыялістам з вышэйшай і сярэдняй спецыяльнай адукацыяй на працягу двух гадоў з дня заключэння з імі працоўнага дагавора (кантракта) кожны месяц даплачваюць 0,46 базавай стаўкі, што ўстанаўліваецца ўрадам для аплаты працы работнікаў бюджэтных арганізацый (Br96,6). Калі работнік прадаўжае працаваць у арганізацыі АПК на ўмовах заключанага кантракта пасля заканчэння першых двух гадоў, даплата ўстанаўліваецца кіраўнікам і спецыялістам на працягу наступных трох гадоў у памеры 0,69 базавай стаўкі (Br144,9).

У арганізацыях бюджэтнай сферы меры стымулявання для маладых спецыялістаў устанаўліваюцца на аснове рашэнняў адпаведных дзяржаўных органаў. Пры гэтым катэгорыі маладых спецыялістаў, памеры стымулюючых выплат і падставы іх устанаўлення розныя.

Напрыклад, стымулюючыя выплаты для маладых спецыялістаў, якім месца работы прадастаўлена шляхам размеркавання (пераразмеркавання), накіравання на работу (наступнага накіравання на работу) у бюджэтныя арганізацыі, падпарадкаваныя Міністэрству адукацыі, Міністэрству культуры, складаюць ад 20 працэнтаў да 45 працэнтаў ад акладу. У сістэме Міністэрства аховы здароўя такія выплаты складаюць ад 20 працэнтаў да 50 працэнтаў ад акладу.

Выпускнікам устаноў сярэдняй спецыяльнай і вышэйшай адукацыі, накіраваным на работу або для праходжання службы (ваеннай службы) на тэрыторыю радыеактыўнага забруджвання (у зону наступнага адсялення і ў зону з правам на адсяленне), прадугледжаны штогадовыя выплаты ў памерах ад 14,5 да 21,5 базавай велічыні (Br464 — Br688) у залежнасці ад тэрміну работы ў радыеактыўных раёнах. Гэтыя выплаты кампенсацыйныя і ажыццяўляюцца за кошт сродкаў, прадугледжаных у рэспубліканскім бюджэце на ліквідацыю наступстваў катастрофы на Чарнобыльскай АЭС.

У тым ліку маладым спецыялістам прадугледжана аднаразовая выплата ў памеры 200 базавых велічынь (Br6400) (тым, хто заключыў кантракт на 5 гадоў пасля 31 снежня 2012 года на работу ў арганізацыях, размешчаных у зонах з правам на адсяленне і наступнага адсялення) або 300 базавых велічынь (Br9600) — пры заключэнні другога кантракта тэрмінам на 5 гадоў пасля 5 гадоў работы на ўмовах першага пяцігадовага кантракта. Таксама належаць надбаўкі ад акладаў за кошт выдзялення дадатковых сродкаў і аднаразовая дапамога ў памеры, вызначаным з прымяненнем каэфіцыентаў да базавай велічыні (ад Br480 да Br2 400).

Звязда, 13 ліпеня 2022