"Выключна ў якасці адказу намі, як і заяўлялася раней, будуць прыняты жорсткія, асіметрычныя, але адэкватныя меры", - адзначаецца ў заяве.
Падкрэсліваецца, што "чым далей будзе працягвацца гэты працэс, тым больш відавочнай становіцца яго небяспека ўжо для стабільнасці і бяспекі ўсяго нашага рэгіёну".
"І віна за ўсё ляжыць выключна на ініцыятары санкцыйнай спіралі і агрэсіі - Еўрапейскім саюзе. Усё яшчэ заклікаем еўрапейскіх палітыкаў раздумацца", - адзначаецца ў заяве, апублікаванай на сайце МЗС Беларусі.
"Дэманізацыя краіны"
Там таксама ўказана, што "глыбіня абсурду як непасрэдна рашэння Еўрапейскага саюза аб чарговых санкцыях супраць суверэннай Беларусі, так і самога яго зместу ўжо з цяжкасцю паддаецца разуменню".
Пры гэтым працягваецца "адкрытая дэманізацыя" краіны - увесь цяжар адказнасці ўскладаецца на Беларусь "пры нахабным ігнараванні сапраўдных прычын глабальнага міграцыйнага крызісу".
"Мэта ўсёй гэтай палітыкі - эканамічна задушыць Беларусь, максімальна ўскладніць і пагоршыць жыццё беларусаў.
Высокапарныя глупствы, якія раздаюцца з еўрапейскіх трыбун, у гэтым выпадку не маюць да рэальнасці ніякага дачынення", - падкрэслілі ў МЗС Беларусі.
Пазбаўляюцца ад канкурэнтаў
У знешнепалітычным ведамстве Беларусі звярнулі ўвагу: Еўрасаюзу ўсё роўна, што пацерпяць дзясяткі тысяч беларускіх грамадзян і членаў іх сем`яў, еўрапейскія спажыўцы, пастаўшчыкі, бізнесмены і кампаніі.
Пры гэтым санкцыямі Захад вырашае дзелавыя інтарэсы пэўных еўрапейскіх колаў.
"Менавіта таму ў пакет уключаны беларускія прадпрыемствы, якія не маюць ніякага дачынення да міграцыйнага крызісу. За гэтым хаваецца жаданне пазбавіцца ад канкурэнтаў", - сказана ў заяве.
Беларусь вытрымае
У заяве сказана, што гэты прэсінг, відавочна, будзе працягнуты "ў сляпой лютасці ад адсутнасці выніку".
"У дадзеным выпадку вынік для еўрапалітыкаў - знішчэнне Беларусі як суверэннай, эканамічна-паспяховай дзяржавы", - адзначаюць у МЗС.
Там дадалі, што краіна не першы раз сутыкаецца з такімі выклікамі з боку Захаду.
"Як і раней, беларуская дзяржава адужэе, пройдзе гэты этап з годнасцю і абароніць адпаведны ўзровень жыцця свайго насельніцтва", - падкрэсліваецца ў заяве.
Новыя санкцыі Захаду
Еўрасаюз 2 снежня прыняў пяты пакет санкцыяў супраць Беларусі, гаворыцца ў афіцыйнай заяве Савета ЕС.
Чорны спіс датычыцца 11 суб`ектаў гаспадарання, а таксама 17 фізічных асоб, абвінавачаных у арганізацыі нелегальнай міграцыі.
Разам з ЕС свае абмежаванні ў адносінах да Беларусі ўвялі і ЗША. У новы пакет рэстрыкцыяў увайшлі 20 фізічных асоб, 12 арганізацый і тры паветраныя судны. Сярод тых, каго закрануў новы пакет санкцый ЗША, - сын прэзідэнта Беларусі Аляксандра Лукашэнкі Дзмітрый.
Акрамя таго, ЗША увялі санкцыі супраць дзяржаўных даўгавых абавязацельстваў Мінска.
Канада і Вялікабрытанія таксама прынялі санкцыі. Канада ўнесла ў чорны спіс 24 фізічныя і сем юрыдычных асоб з Беларусі. Сярод грамадзян Беларусі, супраць якіх Канада ўвяла абмежаванні, таксама значыцца Дзмітрый Лукашэнка, сын беларускага прэзідэнта.
Прадстаўнікі брытанскага ўрада паведамілі, што іх краіна ўводзіць санкцыі ў дачыненні да кампаніі "Беларуськалій", а таксама шэрагу грамадзян рэспублікі. У прыватнасці, у спісе аказаліся пяць журналістаў дзяржаўных СМІ.
ЗША, Канада, Вялікабрытанія і ЕС апублікавалі сумесную заяву з нагоды прыняцця калектыўных санкцыяў.
Яны патрабуюць ад Мінска спынення "арганізацыі незаконнай міграцыі" праз межы Еўрасаюза, вызвалення палітвязняў і пачатку дыялогу з апазіцыяй.
