Акрамя павышэння ПДВ, будуць часова прыпынены выплаты ў сувязі з ростам пражытачнага мінімуму (надбаўка на дарагоўлю) бюджэтнікам.

Паступленні ў казну Саудаўскай Аравіі рэзка скараціліся з падзеннем цэн на энерганосьбіты і спыненнем паветраных пералётаў на фоне пандэміі каранавіруса. Пры гэтым ПДВ у краіне быў уведзены толькі два гады таму - у спробе скараціць залежнасць эканомікі краіны ад сусветных цэн на нафту-сырэц.

Згодна з новымі правіламі, з 1 ліпеня ПДВ вырасце з 5 працэнтаў да 15 працэнтаў, а выплата надбаўкі на дарагоўлю жыцця будзе прыпынена з 1 чэрвеня.

"Гэтыя меры балючыя, але неабходныя, каб падтрымліваць фінансавую і эканамічную стабільнасць у сярэдне- і доўгатэрміновай перспектыве і пераадолець гэты беспрэцэдэнтны каранавірусны крызіс з найменшымі стратамі", - заявіў міністр фінансаў Махамед аль-Джадаан.

Заява прагучала пасля таго, як па выніках I квартала расходы перавысілі даходы ў казну, а бюджэтны дэфіцыт склаў $9 млрд. Даходы ад нафты ў каралеўстве ўпалі за гэты перыяд амаль на 25 працэнтаў у параўнанні з тым жа перыядам 2019 года - да $34 млрд, а агульная выручка скарацілася на 22 працэнты. У той жа час Цэнтрабанк Саудаўскай Аравіі яшчэ ў сакавіку даў справаздачу аб рэзкім скарачэнні золатавалютных рэзерваў да самага нізкага ўзроўню з 2011 года.

Гэтыя меры, як чакаецца, запаволяць тэмпы і маштаб праграмы эканамічных рэформ "Бачанне-2030", якую спрабуе ажыццявіць кронпрынц Мухамед ібн Салман. У 2019 годзе Сірыя змагла атрымаць рэкордныя $25,6 млрд, выпусціўшы на біржу ў Эр-Рыядзе першасныя акцыі нацыянальнага нафтавага гіганта Aramco. Гэты крок стаў адным з асноўных у планах кронпрынца па мадэрнізацыі эканомікі і аслабленні яе залежнасці ад нафтавых цэн.

11 мая 2020, Мінск
БЕЛТА