Тэмп росту рэальнай заработнай платы ў 2019 годзе ў параўнанні з 2018-м згодна з прагнозам павінен скласці 103,8 працэнта.

"Тэмп росту ў бюджэтнай сферы - 104,2 працэнта", - сказала Ірына Касцевіч. У мінулым годзе ў параўнанні з 2017-м тэмп росту зарплаты дасягнуў 110,2 працэнта (у бюджэтнай сферы - 113,1 працэнта). Гэты паказчык расце з 2016 года - па выніках 2017-га рэальная заработная плата вырасла на 6,9 працэнта, а ў бюджэтнай сферы - на 4,6 працэнта.

Таксама Ірына Касцевіч адзначыла, што ў 2018 годзе міністэрства актыўна працавала над павышэннем аплаты працы ў бюджэтнай сферы, і нагадала аб падрыхтаваным праекце ўказа "Аб аплаце працы работнікаў бюджэтных арганізацый".

"Думаю, у бліжэйшы час ён будзе прыняты, - сказала яна. - Але асноўная мэта - аптымізаваць, спрасціць сістэму налічэння зарплаты ў бюджэтнай сферы".

Як растлумачыла міністр, у Беларусі за мінулыя гады сфарміравалася даволі архаічная сістэма аплаты працы бюджэтнікаў. Іх зарплата складаецца не толькі з акладу, але і вялікай колькасці розных даплат і заахвочванняў, колькасць якіх часам перавышае два дзясяткі.

Новы нарматыўна-прававы акт накіраваны на зразумелую сістэму аплаты працы, каб стабільная частка акладу была на ўзроўні 50-60 працэнтаў, астатняе - стымулюючыя надбаўкі.

Гаворачы ў цэлым аб удасканаленні аплаты працы ў адпаведнасці з узроўнем кваліфікацыі, міністр расказала аб планах змяніць адзіную тарыфную сетку, якая складаецца цяпер з 27 тарыфных разрадаў. Іх колькасць зменшыцца да 18 - з размеркаваннем катэгорый работнікаў па прафесійна-кваліфікацыйных групах і дыяпазонах тарыфных разрадаў.

Таксама тарыфную стаўку першага разраду плануецца замяніць базавай стаўкай. І будуць пашыраны правы кіраўнікоў дзяржорганаў і бюджэтных арганізацый па прымяненні найбольш эфектыўных метадаў стымулявання працы работнікаў.

4 студзеня 2019, Мінск
БЕЛТА