У 2025 годзе "БелДжы" плануе выйсці на рынкі Кыргызстана, Арменіі і Казахстана, паведаміў дырэктар завода Генадзь Свідзерскі.
У дадзены момант айчынныя красоверы Belgee і аўтамабілі кітайскай маркі Geely, якія збіраюцца пад Барысавам, даступны пакупнікам з Беларусі і Расіі.
"Сёння думаем над тым, як пашырыць геаграфію паставак. У 2025 годзе плануем выйсці на рынкі іншых краін ЕАЭС – Кыргызстана, Арменіі, Казахстана. Калі планы ўдасца рэалізаваць, то і аб’ёмы вытворчасці для знешняга рынку, адпаведна, вырастуць", - сказаў Свідзерскі ў інтэрв’ю БелТА.
Ён адзначыў, што сёлета завод плануе выпусціць больш за 30 тыс аўтамабіляў толькі для ўнутранага рынку. У 2024-м гэтая лічба была на ўзроўні 25 тыс, пры гэтым прадпрыемства працавала без выхадных і па 12 гадзін за дзень. Усяго ж за мінулы год было выраблена і прададзена больш за 90 тыс машын, што з’яўляецца рэкорднай колькасцю.
"Прыемна, што з 90 тыс машын 25 тыс рэалізавана ў рэспубліцы", - праінфармаваў дырэктар "БелДжы".
Паводле яго слоў, яшчэ год таму пакупнікі гэтых аўтамабіляў скардзіліся на расцягнутыя тэрміны вытворчасці і вялікую чаргу: каб набыць машыну, даводзілася чакаць часам тры месяцы. Цяпер жа напружаны попыт, які назіраўся раней, зняты.
Прэм’ер-міністр Беларусі Раман Галоўчанка ў верасні заяўляў, што ў бліжэйшы час для завода стаіць мэта давесці аб’ём вытворчасці да 100 тысяч аўтамабіляў за год.
Акрамя таго, прадпрыемства ў 2025 годзе плануе выпусціць электрычную і метанавую версію аўтамабіляў.
