Гэта трэба прымаць да ўвагі як пры аналізе бягучай працы ўрада, так і пры разглядзе прагнозу бюджэту на наступны год, дадаў прэм`ер. 

У прыватнасці, Мясніковіч звярнуў увагу на "рэзкае запавольванне эканамічнага росту і глыбокую дэвальвацыю нацыянальных валют" у краінах — асноўных гандлёвых партнёрах Беларусі. Так, расійскі рубель сёлета дэвальвіраваны на 40%, украінская грыўна — на 70%, казахстанскі тэнге — на 20%. 

У выніку, паведаміў кіраўнік урада, экспарт Беларусі ў Расію скараціўся на 5,7%, ва Украіну — на 5,3%, Казахстан — на 3,8%. "Пры гэтым узраслі продажы на рынках дзяржаў, якія не ўваходзяць у СНД. Але яны не могуць перакрыць аб`ёмы традыцыйных рынкаў", — падкрэсліў ён. 

Мясніковіч таксама ўказаў на працяг "эскалацыі геапалітычнай напружанасці ў рэгіёне, кардынальнае змяненне рынкаў нафты, што адаб`ецца і на іншых сыравінных рынках". "Гэтыя і іншыя з`явы рэзка павышаюць няпэўнасць і рызыкі прагнознага перыяду", — заявіў прэм`ер-міністр, адзначыўшы, што эканамічная палітыка ў такіх умовах павінна быць "вельмі гнуткай". 

Паводле слоў Мясніковіча, урад сумесна з Нацыянальным банкам прапрацаваў сем варыянтаў дзеянняў, якія можна будзе скарыстаць, зыходзячы са знешніх абставінаў.

У сустрэчы з дэпутатамі акрамя Мясніковіча ўдзельнічаюць таксама кіраўнікі міністэрстваў эканомікі, фінансаў і Нацбанка. Чыноўнікі "адкажуць на пытанні парламентарыяў, якія тычацца праектаў прагнозу сацыяльна-эканамічнага развіцця, рэспубліканскага бюджэту і Асноўных кірункаў грашова-крэдытнай палітыкі на 2015 год", паведаміла сёння раніцай прэс-служба Палаты прадстаўнікоў. 

Як паведаміў на мінулым тыдні Аляксандр Лукашэнка, у найбліжэйшы час ён мае намер правесці нараду па эканамічных пытаннях, на якой будзе заслухана справаздача ўрада аб працы ў гэтым годзе і разгледжаны асноўныя прагнозныя дакументы на 2015 год. Паводле неафіцыйнай інфармацыі, нарада адбудзецца ўжо заўтра, 11 лістапада.

Сяргей Каралевіч, БелаПАН
Мінск, 10 лістапада 2014