"Беларусбанк" вызначаны банкам-агентам па абслугоўванні льготнага пакупніцкага крэдыту Экспартна-імпартнага банка Кітая, які выдзяляецца для рэалізацыі інвестпраекта па будаўніцтве пад ключ інжынернай і транспартнай інфраструктуры стартавай зоны паўночнай пляцоўкі тэрыторыі першачарговага асваення кітайска-беларускага індустрыяльнага парка. 

Старшыня праўлення ААТ "ААБ "Беларусбанк", згодна з пастановай, надзелены правам афармлення і падпісання дакументаў, звязаных з выбаркай па крэдыце. Афармленнем жа і падпісаннем дакументаў, неабходных для рэалізацыі крэдытнага пагаднення, будзе займацца гендырэктар кітайска-беларускага сумеснага закрытага акцыянернага таварыства "Кампанія па развіцці індустрыяльнага парка". 

Міністэрству фінансаў даручана выдзеліць СЗАТ "Кампанія па развіцці індустрыяльнага парка" крэдыт, атрыманы ў адпаведнасці з крэдытным пагадненнем, на 170 млн. долараў для рэалізацыі гэтага інвестпраекта і заключыць з названай арганізацыяй, Мінскім аблвыканкамам, а таксама ААТ "ААБ "Беларусбанк" дагавор аб парадку выкарыстання і пагашэння гэтага крэдыту. 

Функцыі па каардынацыі і кантролі за рэалізацыяй СЗАТ "Кампанія па развіцці індустрыяльнага парка" гэтага праекта ўскладзеныя на Мінэканомікі, у тым ліку праз рабочую групу па пытаннях кітайска-беларускага індустрыяльнага парка. Кантроль за мэтавым выкарыстаннем і своечасовым пагашэннем і абслугоўваннем "Кампаніяй па развіцці індустрыяльнага парка" крэдыту будзе ажыццяўляць Мінскі аблвыканкам. 

Персанальная адказнасць за рэалізацыю праекта, мэтавае выкарыстанне сродкаў крэдыту, а таксама своечасовае яго пагашэнне, выплату працэнтаў, камісійных збораў, а таксама іншых плацяжоў па ім ускладзеная на генеральнага дырэктара СЗАТ "Кампанія па развіцці індустрыяльнага парка". 

Пастанова набыла моц з дня прыняцця.

Марына Носава, БелаПАН
Мінск, 31 жніўня 2015