Пра гэта заявіла каардынатар кампаніі "Будзьма беларусамі" Ніна Шыдлоўская 27 красавіка на прэс-канферэнцыі ў Мінску.
Паводле яе слоў, трэці фестываль працягне арыентавацца на некамерцыйную сферу — сацыяльна значныя і культурныя праекты, а таксама на праекты, якія дэманструюць прафесійным удзельнікам рэкламнага рынку і бізнесменам эфектыўнасць прасоўвання тавараў і паслуг на беларускай мове. Гэта дапаможа ўцягнуць іх у працэс пошуку новых крэатыўных ідэй і форм камунікацыі, адкрыць новыя магчымасці ўжывання беларускай мовы ў рэкламе.
"Першы фестываль быў патрэбны, каб правесці маніторынг, што ў нас ёсць на беларускамоўным рэкламным рынку. Другі імкнуўся абудзіць ініцыятыву. На трэцім фестывалі мы паспрабуем падштурхнуць нашых вытворцаў і рэкламістаў па-новаму паглядзець на свае брэнды з пункту гледжання арыентаванасці на беларусаў і больш актыўнага выкарыстання беларускай мовы ў рэкламе", — сказала Шыдлоўская.
27 красавіка стартаваў прыём работ на ўдзел у намінацыях і конкурсах фестывалю, які адкрыецца 5 ліпеня.
БелаПАН27 красавіка 2012
