16—17 красавіка ў штаб-кватэры СНД у Мінску эксперты абмяркоўваюць праект плана асноўных мерапрыемстваў па падрыхтоўцы да святкавання 70-годдзя Перамогі ў Вялікай Айчыннай вайне.
Як паведаміла прэс-служба Выканаўчага камітэта Садружнасці, дакумент быў распрацаваны ў мэтах выканання рашэння Савета кіраўнікоў дзяржаў, прынятага на саміце ў Ашхабадзе ў снежні 2012 года. Свае прапановы ў план прадставілі Азербайджан, Арменія, Беларусь, Казахстан, Кыргызстан, Малдова, Расія, Таджыкістан і Украіна, а таксама Каардынацыйны савет ветэранаў, сакратарыят Савета міністраў абароны, каардынацыйная служба Савета камандуючых Пагранічнымі войскамі, Савет міністраў унутраных спраў, Савет па справах моладзі, Канфедэрацыя саюзаў кінематаграфістаў краін СНД і Міждзяржаўная тэлерадыёкампанія "Мір".
У прыватнасці, у рамках святкавання 70-годдзя Перамогі прапаноўваецца падпісаць зварот кіраўнікоў дзяржаў Садружнасці да народаў краін СНД і сусветнай грамадскасці ў сувязі з юбілейнай датай, вырабіць і ўручыць ветэранам Вялікай Айчыннай вайны адзіныя ганаровыя ордэны і юбілейныя медалі, правесці міжнародную навукова-практычную канферэнцыю, прысвечаную 70-годдзю Перамогі. У ліку прапаноў таксама правядзенне эстафеты Перамогі ўздоўж дзяржаўных межаў краін СНД і міжнароднай Вахты Памяці, падрыхтоўка серыі кароткаметражных дакументальных фільмаў "Вызваленне" пра кожны дзень апошніх шасці месяцаў Вялікай Айчыннай вайны 1941—1945 гадоў, арганізацыя і правядзенне тэле- і радыёмастоў сустрэч аднапалчан — удзельнікаў Вялікай Айчыннай вайны з дзяржаў Садружнасці.
Непасрэдна ў дзень свята, 9 мая, у сталіцах краін СНД прапаноўваецца правесці ваенныя парады і салюты, прысвечаныя 70-й гадавіне Перамогі, з удзелам ветэранаў і працаўнікоў тылу з дзяржаў — удзельніц Садружнасці, Літвы, Латвіі, Эстоніі і краін антыгітлераўскай кааліцыі.
Акрамя таго, ва ўсіх краінах Садружнасці плануецца правесці розныя навукова-практычныя канферэнцыі, выставы і фестывалі, сустрэчы герояў вайны, заснаваць спецыяльныя конкурсы па стварэнні навуковых прац, дакументальных фільмаў, твораў літаратуры і мастацтва, якія раскрываюць падзеі ваенных гадоў.
У праект плана асноўных мерапрыемстваў па падрыхтоўцы да святкавання 70-й гадавіны Перамогі савецкага народа ў Вялікай Айчыннай вайне 1941—1945 гадоў таксама ўключаны раздзелы, прысвечаныя пытанням сацыяльнай абароны ўдзельнікаў і інвалідаў вайны і ўвекавечання памяці абаронцаў Айчыны.
Пасля канчатковага ўзгаднення экспертамі праект плана будзе ва ўстаноўленым парадку ўнесены на разгляд Савета кіраўнікоў дзяржаў СНД.
Вячаслаў Будкевіч,
БелаПАHМінск, 16 красавіка 2013
