Як стала вядома "Звяздзе", знакамітага беларускага байца ўзнагародзілі за тыдзень да Новага года — 24 снежня. Значок "Заслужаны майстар спорту Рэспублікі Беларусь" уручыў тады яшчэ прэм`ер-міністр Беларусі Сяргей Сідорскі.

Чаму мы пішам пра гэтую падзею ў святочным нумары?

Справа ў тым, што Віталь Гуркоў стаў першым вядомым беларускім спартсменам у гісторыі, які публічна па дзяржаўным тэлебачанні выказаўся на роднай мове. Здарылася гэта пасля перамогі на ўсходнееўрапейскім Гран-пры К-1 у сакавіку 2010-га. Пасля гэтага папулярнасць байца пайшла ўгару. І вось заслугі Гуркова (баец восем разоў перамагаў на чэмпіянаце свету па муай-тай) адзначыла дзяржава. Званне "Заслужаны майстар спорту" маюць, напрыклад, алімпійскія чэмпіёны Андрэй Арамнаў (цяжкая атлетыка) і Аляксей Грышын (фрыстайл).

— І дзе зараз ваш значок "Заслужаны майстар спорту"? — сустрэліся мы з Віталем у трэніровачным клубе "Патрыёт". — Напэўна, на самым ганаровым месцы ляжыць.

— Калі шчыра, забыўся забраць значок з машыны, ляжыць у бардачку.

— Ці ўразіла вас цырымонія ўручэння?

— Адчуваў сябе на мерапрыемстве, так бы мовіць, не ў сваёй талерцы. Былі не толькі спартсмены, але і перадавікі з прадпрыемстваў, настаўнікі, дырэктары школ. Прэм`ер-міністр усіх пахваліў, гаварыў пра выкананне планаў на пяцігодку. Потым падыходзіў да кожнага і ціснуў руку, казаў нейкія словы, фатаграфаваўся.

— Што сказаў вам?

— Вельмі стрымана пажадаў поспехаў.

— Ці звярталіся да вас яшчэ нейкія афіцыйныя асобы, ці падтрымлівалі вашы беларускамоўныя памкненні?

— Нядаўна, на прэс-канферэнцыі, прысвечанай чэмпіянату свету, да мяне падышлі супрацоўнікі "Белзнешэканамбанка", падарылі беларускамоўны каляндар. Сказалі, што чытаюць мае інтэрв`ю ў сеціве і ў прэсе, ведаюць, што я цікаўлюся гісторыяй. Уручылі старажытную карту Вялікага Княства Літоўскага на лацінскай мове. Цудоўны падарунак...

Нагадаем, што Віталь Гуркоў з`яўляецца шматразовым чэмпіёнам свету па муай-тай і лідарам нацыянальнай зборнай. У гэтым сезоне Віталь сустракаўся з самымі магутнымі прафесіяналамі планеты. Напрыклад, з чэмпіёнам свету па К-1 італійцам Джорджыа Петрасянам (па нязручных для беларуса правілах кікбоксінга, дзе нельга біць локцем і ўжываць клінч). Віталь прайграў па пунктах, але выглядаў вельмі годна і не атрымаў ніводнай траўмы. Пасля гэтага двубоя папулярнасць беларускага байца ў Заходняй Еўропе і ў Японіі павялічылася ў шмат разоў.

Па любімых для сябе правілах муай-тай Віталь сустрэўся з Петчманконгам (жалезным чэмпіёнам Тайланда). На думку многіх спецыялістаў, беларус аказаўся нечакана мацнейшым (двубой выкладзены ў інтэрнэце). Але тайскія суддзі аддалі перамогу свайму. У астатніх прафесійных двубоях Гуркоў перамог.

У новым сезоне, набраўшыся досведу на прафесійным рынгу, беларус плануе выйсці на першыя радкі сусветных рэйтынгаў.

Трэніруецца Віталь у мінскім клубе "Патрыёт". Пасля Новага года з`явіцца інтэрнэт-старонка клуба на беларускай мове.

Яўген Валошын
31 снежня 2010
Звязда