У гульні другога круга кваліфікацыі на поле АСК «Брэсцкі» чэмпіёны Беларусі абыгралі чэмпіёна Босніі і Герцагавіны «Сараева» з лікам 2:1. Гаспадары вельмі актыўна пачалі гульню, і ўжо на 3-й хвіліне Міхаіл Гардзяйчук адкрыў лік. Берасцейцы працягвалі валодаць ініцыятывай, але на 34-й хвіліне прапусцілі вострую контратаку гасцей, і Андрэй Даканавіч аднавіў парытэт. Пасля перапынку дынамаўцы адразу пайшлі наперад і праз 4 хвіліны Абдула Дыяло забіў пераможны гол.

У першым раўндзе кваліфікацыі ЛЧ брэсцкія дынамаўцы таксама на сваім полі разграмілі казахстанскую «Астану» з Нур-Султана з вынікам 6:3.

Лёсаванне трэцяга раўнда ЛЧ адбудзецца 31 жніўня ў штаб-кватэры УЕФА ў швейцарскім Ньёне. Матчы пройдуць 15 і 16 верасня. Пераможцы выйдуць у плэй-оф ЛЧ, а тыя, хто прайграў, працягнуць выступ у другім па рангу кантынентальным турніры — Лізе Еўропы.

Адзначым, што брэсцкае «Дынама» ўжо гарантавала сабе 1,7 млн еўра ганарару ад УЕФА за ўдзел у еўракубках.

Звязда, 27 жніўня 2020