Вікторыя Азаранка выступіць дырэктарам дзіцячага тэніснага падагульняючага турніру сезона, які адбудзецца ў Мінску на кортах Рэспубліканскага цэнтра алімпійскай падрыхтоўкі.

Падагульняючы турнір сезона для юнакоў і дзяўчат 12, 14 гадоў адбудзецца ўпершыню. Лепшыя ігракі, якія прадстаўляюць тэнісныя школы з усёй краіны, прымуць удзел у спаборніцтвах. Па восем юнакоў і дзяўчат у кожнай катэгорыі, якія ўзначальваюць нацыянальны рэйтынг, выступяць у адзіночным разрадзе за права стаць пераможцам.

Знакамітая тэнісістка асабіста ўручыць каштоўныя падарункі пераможцам турніру. Прызёраў чакае асаблівы бонус - сертыфікаты на фінансаванне адной, дзвюх або трох камандзіровак на турніры (у залежнасці ад занятага месца).

Такім чынам, падагульняючы турнір адкрые новыя магчымасці для юных беларускіх тэнісістаў заявіць пра сябе на міжнародных турнірах, атрымаць каштоўны гульнявы вопыт. Адкрыццё турніру на кортах РЦАП па тэнісе адбылося сёння раніцай, а пераможцы і прызёры вызначацца 14 кастрычніка.

11 кастрычніка 2016, Мінск
БЕЛТА