Беларуска Надзея Астапчук заваявала залаты медаль у штурханні ядра на Кубку Еўропы па кіданнях, які прайшоў 17—18 сакавіка ў Чарнагорыі.
Астапчук адправіла снарад на адзнаку 20 метраў і 29 сантыметраў, апярэдзіўшы сярэбраную прызёрку немку Надзін Кляйнерт (19,12) больш чым на метр.
Нагадаем, 10 сакавіка Астапчук выйграла "серабро" на чэмпіянаце свету па лёгкай атлетыцы ў памяшканнях (20,42).
Усяго на Кубку Еўропы па кіданнях беларуская зборная заваявала чатыры медалі ў асабістых дысцыплінах (1 золата, 2 серабра, 1 бронза), а таксама ў камандным заліку мужчынская зборная (ва ўзроставай катэгорыі да 23 гадоў) заняла трэцяе месца.
Акрамя Астапчук з беларусаў на п`едэстал у Чарнагорыі падняліся: Сяргей Каламоец — кіданне молата (2-е месца ў дарослым заліку, 75,15), Павел Барэйша — кіданне молата (3-е месца ў групе моладзі да 23 гадоў, 69,16), Аліна Кастрова — кіданне молата (2-е месца сярод моладзі да 23 гадоў, 67,86).
Аляксандр Ванковіч,
БелаПАНМінск, 19 сакавіка 2012
