Званне наймацнейшай на планеце Наздрова заваявала на дыстанцыі 1000 метраў сярод каноэ-адзіночак. Першую палову фінальнага заезду Алена ішла другой, але затым захапіла лідарства і пайшла ў адрыў. У нейкі момант перавага беларускі дасягнула чатырох секунд. Бліжэй да фінішу да нашай канаісткі наблізілася венгерка Джада Брагата, але апярэдзіць Наздрову не змагла. Тройку прызёраў замкнула кітаянка Дзян Сіна.

Такім чынам, беларуская спартсменка стала чатырохразовай чэмпіёнкай свету, усяго ў актыве Алены 10 узнагарод з сусветных першынстваў (4-2-4). Раней сёлета Наздрова атрымала перамогу на чэмпіянаце Еўропы на дыстанцыі ўдвая карацейшай.

Звязда, 24 жніўня 2024