Замест прывычных для пасьюта 12,5 км мужчыны прабеглі толькі 7,5 км - арганізатары скарацілі дыстанцыю з-за анамальна цёплага для студзеня надвор`я, якое не дало магчымасці падрыхтаваць трасу поўнасцю. З прычыны зняцця пяці кіламетраў таксама былі зменшаны разрывы паміж гоншчыкамі на старце - напярэдадні ў спрынце Дзмітрый Лазоўскі перамог з перавагай 24 секунды, ад якой сёння засталося толькі 12.

Пасля палавіны гонкі Лазоўскі захоўваў першы радок, але на стойцы беларус дапусціў тры промахі і адкаціўся за межы тройкі. На лідзіруючую ролю ў нацыянальнай камандзе вярнуўся Антон Смольскі - на чатырох агнявых рубяжах прызёр пекінскай Алімпіяды памыліўся ўсяго адзін раз, дзякуючы чаму падняўся з 15-й стартавай пазіцыі на другую на фінішы.

Апярэдзіць Смольскага змог толькі прадстаўнік Башкортастана Эдуард Латыпаў, трэцім размясціўся Кірыл Бажын са Свярдлоўскай вобласці. Чацвёртае месца ў другой гонцы запар заняў наш Максім Варабей, а Дзмітрый Лазоўскі ў выніку замкнуў шасцёрку мацнейшых. Павел Бялько адыграў па ходзе 19 радкоў і фінішаваў сёмым. Ілья Аўсеенка стаў 14-м, Іван Тулацін - 18-ы, Мікіта Лабастаў - 30-ы сярод 44 спартсменаў.

Для Антона Смольскага суботні подыум стаў чацвёртым у бягучым сезоне Кубка Расіі па біятлоне. У лістападзе на стартавым этапе ў Ханты-Мансійску беларус узяў бронзу ў спрынце, а ў снежні на другім этапе там жа выйграў спрынт і паказаў трэці рэзультат у пасьюце. Сёння спаборніцтвы ў Разані прадоўжыць скарочаная гонка праследавання ў жанчын, якая стартуе ў 14.00.

11 студзеня 2025, Мінск
БЕЛТА