Спаборніцкую праграму заключнага дня турніру адкрылі жаночыя забегі на дыстанцыі 1500 м, удзел у якіх прынялі сем расіянак і адзіная прадстаўніца Беларусі Ганна Дамарацкая. Наша спартсменка паказала трэці вынік (2 мін 00,71 сек.), саступіўшы пераможцы Аляксандры Саюцінай больш за дзве секунды. Срэбраная медалістка Анастасія Сямёнава апярэдзіла беларуску на 0,61 сек. Лідар беларускай каманды на гэтай дыстанцыі Кацярына Гагіева на старт не выйшла.

Такім чынам, Ганна Дамарацкая сабрала поўны камплект узнагарод хатняга турніру: раней беларуска ўзяла два золата (1000 м, камандны спрынт) і адно срэбра (500 м). Далей медалі на «палутарцы» разыграюць мужчыны. Заключным відам праграмы Кубка наймацнейшых спартсменаў па канькабежным спорце ў «Мінск-Арэне» стануць гонкі з масавым стартам.

Звязда, 28 лютага 2025