Беларуская тэнісістка і першая ракетка планеты Арына Сабаленка прабілася ў 1/4 фіналу турніру катэгорыі WTA-1000, які праходзіць у італьянскай сталіцы.
У 1/8 турніру беларуска ў напружанай барацьбе абыграла прадстаўніцу Украіны Марту Касцюк з лікам 6:1, 7:6 (10:8). Спартсменкі правялі на корце крыху больш за дзве гадзіны.
Саперніцы сустракаліся зусім нядаўна на спаборніцтвах у Мадрыдзе, дзе Сабаленка была мацней за Касцюк і выйграла з лікам 7:5, 7:5.
У Рыме матч таксама склаўся цікава: Сабаленка лёгка выйграла першы сэт, а далей украінская тэнісістка навязала ўпартую барацьбу. Пераможцу вызначылі на тайм-брэйку – 10:8 на карысць беларускай тэнісісткі.
У чвэрцьфінале рымскага турніру першая ракетка свету з Беларусі сустрэнецца з алімпійскай чэмпіёнкай Гульняў у Парыжы 2024 года Чжэн Цыньвэнь з Кітая.
Летась Сабаленка дайшла да фіналу турніру ў італьянскай сталіцы, дзе перамагла прадстаўніца Польшчы Іга Свёнтэк.
Турнір у Рыме з’яўляецца заключным грунтавым "тысячнікам" у жанчын у гэтым сезоне. Спаборніцтвы асноўнай сеткі стартавалі 6 мая і завершацца 17 траўня. У жаночым адзіночным разрадзе бяруць удзел 96 тэнісістак.
Прызавы фонд турніру WTA-1000 у 2025 годзе складае больш за шэсць мільёнаў еўра. Пераможца атрымае больш за 877 тыс еўра і 1 000 рэйтынгавых балаў.
