Пяць медалёў заваявала ў Кітаі прадстаўніца беларускай зборнай па мастацкай гімнастыцы Аліна Гараносько, аб гэтым паведаміла прэс-служба Беларускай асацыяцыі гімнастыкі.
Турнір, які праводзіўся па правілах Міжнароднай Асацыяцыі клубаў "Нябесная грацыя", які праходзіў у Пекіне, завяршыўся напярэдадні.
У ім удзельнічалі спартсменкі з 19 краін: Беларусі, Расіі, Арменіі, Аўстраліі, Балгарыі, Гватэмалы, Германіі, Індыі, Італіі, Казахстана, Кітая, Калумбіі, Кыргызстана, Мексікі, ААЭ, Сербіі, Сірыі, Узбекістана і Кубы.
У суботу Гарнасько заваявала адну ўзнагароду – "срэбра" ў мнагаборстве. На наступны дзень беларусцы ўдалося вызначыцца адразу ў чатырох асобных відах. Яна атрымала "золата" ў практыкаванні са скакалкай, "срэбра" па выніках кампазіцыі са стужкай, а таксама дзве бронзавыя ўзнагароды ў праграмах з абручом і булавамі.
Астатнія беларускі таксама размясціліся недалёка ад лідараў: Дар’я Вярэніч у практыкаваннях са скакалкай стала шостай, Дар’я Грохатава заняла пятае месца ў кампазіцыі з абручом, Лізавета Зоркіна стала чацвёртай у кампазіцыі з булавамі і пятай у практыкаванні са стужкай.
У медальнай цырымоніі прынялі ўдзел зоркі расійскай мастацкай гімнастыкі. Пераможцаў мнагаборства ўзнагароджвала алімпійская чэмпіёнка Аліна Кабаева.
Допуск да міжнародных спаборніцтваў
У ліпені гэтага года Міжнародная федэрацыя гімнастыкі (FIG) аб’явіла аб допуску спартсменаў з РФ і Беларусі да міжнародных спаборніцтваў у нейтральным статусе з 1 студзеня 2024 года. Пазней, у лістападзе, федэрацыя на сваім афіцыйным сайце апублікавала крытэрыі такога допуску.
Разам з тым, 1 снежня стала вядома, што Генеральная асамблея Еўрапейскага гімнастычнага саюза (European Gymnastics) прагаласавала супраць вяртання спартсменаў і афіцыйных асоб з Расіі і Беларусі на афіцыйныя еўрапейскія спаборніцтвы па гімнастыцы з 1 студзеня 2024 года.
Такім чынам, гэтая структура праігнаравала рашэнне Міжнароднай федэрацыі гімнастыкі (FIG).
