Беларускі біятланіст Антон Смольскі стаў трэцім у мужчынскай спрынтарскай гонцы на трэцім этапе Кубка свету ў аўстрыйскім Хахфільцэне.
Нямецкі біятланіст Ёханэс Кюн выйграў мужчынскую гонку. Дыстанцыю ў 10 кіламетраў ён пераадолеў за 26 хвілін і пяць секунд, дапусціўшы адзін промах на другім агнявым рубяжы. Беларус Антон Смольскі замкнуў тройку наймацнейшых, адстаўшы ад лідэра на 20,5 секунды (без промахаў). Другім стаў швед Марцін Пансілуома (14,3; 1 промах).
Беларус Дзмітрый Лазоўскі стаў дзевятым (+40,4; без промахаў). Раман Ялетнаў паказаў 19-ы вынік (+55,8; 1 промах), Сяргей Бачарнікаў - 52-ы (+1:42,5; 1 промах), Максім Варабей стаў 91-м (+2:53,9; 4 промахі).
Усяго фінішавалі 117 спартсменаў.
Працягнуцца спаборніцтвы ў пятніцу жаночым спрынтам (16.15). У стартавым пратаколе знаходзяцца Ірына Лешчанка, Дзінара Алімбекава, Ганна Сола, Алена і Ірына Кручынкіны.
Трэці этап Кубка свету ў Хахфільцэне працягнецца ў суботу гонкай пераследу ў мужчын і эстафетай у жанчын. Завершыцца этап у нядзелю эстафетай у мужчын і гонкай пераследу ў жанчын.
