Люблянская кампанія «RIKO d.o.o.» выйграла тэндэр на будоўлю ў гістарычным цэнтры Менску пяцізоркавага гатэлю «Kempinski».
Новы гатэль, які плянуецца адкрыць да пачатку ўсясьветнага хакейнага першынства, разьмесьціцца ў цэнтры беларускай сталіцы на плошчы ў 23 000 квадратных мэтраў. Акрамя таго, «RIKO» пабудуе ў Менску 81 жылы дом і камэрцыйныя будынкі. Увесь комплекс будзе каштаваць 100 мільёнаў эўра, будоўля «Kempinski» ацэньваецца ў 57 мільёнаў эўра, паведамляе славенскае агенцтва STA.
Паводле кіраўніцтва «RIKO», звыш паловы фінансаваньня забудоўнік забясьпечыць самастойна; астатняе пакрые крэдыт. Яго выдзеліць кансорцыюм славенскіх і іншаземных банкаў.
За 10 гадоў прысутнасьці ў Беларусі «RIKO» рэалізавала больш за 20 праектаў у галіне мэталаапрацоўчага абсталяваньня, у прыватнасьці, на «МТЗ», «МАЗе», «БелАЗе», «Гомсельмашы» і іншых прадпрыемствах.
Апошні раз рэгіён былой Югаславіі беларускі прэзыдэнт наведаў у лютым 2010, калі прыехаў у Сэрбію. Гэты гарналыжны адпачынак Лукашэнкі выклікаў крытычную рэакцыю ў шэрагу мясцовых палітыкаў, журналістаў ды грамадзкасьці.
Раней, у 2004, гэтаксама адмоўна адрэагавалі на ягоны лыжны адпачынак і ў Славеніі. Скандал быў выкліканы тым, што беларускі кіраўнік (на той час пэрсона нон-грата ў ЭЗ) прыбыў у Славенію за тыдзень да яе ўступу ў Зьвяз.
Радыё Свабода 21 лютага 2012
