Віцэ-прэм’ер Расеі Ігар Шувалаў сказаў, што Мытны саюз Расеі, Казахстану і Беларусі на "другім этапе" свайго фармаваньня можа аказацца бяз гэтай апошняй.
Паводле Шувалава, 5 ліпеня ў Астане на пасяджэньні міждзяржаўнай рады Эўразійскай эканамічнай супольнасьці будзе прынятае рашэньне аб далейшым лёсе Мытнага саюзу.
"Гэтае рашэньне будзе аб другім этапе Мытнага саюзу: або Расея, Казахстан і Беларусь, гэта значыць, траісты фармат, як мы і дамаўляліся раней. Або гэта будзе фармат Расея і Казахстан", — цытуе Шувалава Інтэрфакс.
Шувалаў выступаў на канфэрэнцыі пад назвай "Расея і СНД — на шляху да глябалізацыі" ў Маскве.
Шувалаў таксама сказаў на гэтай канфэрэнцыі, што Расея не гатовая распаўсюдзіць льготы, якія будуць дзейнічаць у Мытным саюзе для Казахстану і Беларусі, на іншыя краіны СНД, якія да гэтага саюзу не далучацца.
Расея і Казахстан ужо ратыфікавалі дамову аб кодэксе Мытнага саюзу, а Беларусь — яшчэ не.
28.06.2010
Радыё Свабода
