Стварэнне адзінай еўразійскай валюты нявыгаднае ні Расіі, ні іншым краінам ЕўрАзЭС, заявіў былы міністр фінансаў РФ Аляксей Кудрын.
"Я думаю, гэта рашэнне нявыгаднае Расіі, і я не бачу гэту ідэю як перспектыўную", — сказаў Кудрын журналістам у кулуарах Пецярбургскага міжнароднага эканамічнага форуму, каментуючы прапанову прэм`ер-міністра краіны Дзмітрыя Мядзведзева падумаць аб стварэнні адзінай валюты на тэрыторыі ЕўрАзЭС.
"Таксама думаю, гэта рашэнне нявыгаднае і краінам, якія маглі б увайсці ў гэты валютны саюз", — дадаў Кудрын, словы якога прыводзіць РІА Новости.
Ён патлумачыў, што многія члены ЕўрАзЭС не маюць суверэнных фінансавых рэйтынгаў. "Гэта азначае, што якасць фінансавых сістэм [у гэтых краінах] ніжэйшая за разумнае. Калі іх зараз уцягваць у адзіную прастору — гэта істотнае пагаршэнне якасці расійскага рубля", — заявіў эксперт.
Апрача таго, ён нагадаў, што многія з гэтых краін звяртаюцца па дапамогу да Міжнароднага валютнага фонду, гэта значыць не здольныя самастойна прыцягваць сродкі на знешніх рынках. "Іх фінансавыя сістэмы знаходзяцца ў перманентным крызісе. Я не лічу неабходным краіны, што знаходзяцца ў перманентным фінансавым крызісе, уцягваць у адзіную валютную прастору", — заявіў Кудрын.
Экс-кіраўнік Мінфіна Расіі ўказаў на вопыт Еўрасаюза: пабудова валютнага саюза павінна ўвязвацца з жорсткай фінансавай палітыкай і жорсткімі бюджэтнымі абмежаваннямі з агульнымі прынцыпамі фіскальнай палітыкі. "Нам давядзецца задаваць прынцыпы для гэтых краін і ўвесь час знаходзіцца з імі ў канфлікце, прымушаць гэтыя краіны выконваць гэтыя жорсткія абмежаванні, — сказаў ён. — У выпадку валютнага саюза валютны курс краін, што ўвайшлі ў гэты саюз, будзе падпарадкоўвацца фундаментальным паказчыкам Расіі, а не гэтых краін, якія ўвайшлі ў саюз, гэта значыць ён будзе ўмацоўвацца супраць неабходнасці гэтых краін або будзе аслабляцца празмерна. Я мяркую, гэта будзе нявыгадна гэтым краінам".
На думку Кудрына, сама Расія не гатовая прапанаваць суседзям такі саюз, паколькі яе бюджэт захоўвае высокую залежнасць ад нафты: "Каб прапанаваць паслугі валютнага саюза іншым краінам, трэба спачатку пераадолець гэту залежнасць і не ставіць пад гэтыя рызыкі іншыя краіны".
"Мяркую, зараз, на працягу бліжэйшых дзесяці гадоў, гэта ідэя не для нашай краіны", — заявіў экс-міністр фінансаў РФ.
БелаПАНМінск, 21 чэрвеня 2012
