Беларускі дзяржаўны ўніверсітэт прадстаўлены ў новым міжнародным рэйтынгу ўніверсітэтаў U-Multirank, першыя даныя якога былі апублікаваныя 13 траўня.
Як паведамляе прэс-служба БДУ, U-Multirank не фарміруе плоскай табліцы з прысваеннем парадкавага нумара і ўяўляе сабою базу даных вядучых універсітэтаў свету, дзе кожны карыстальнік можа самастойна выбудаваць градацыю ВНУ ў залежнасці ад сваіх пераваг.
Стварэнне падобнай базы абумоўлена тым, што большасць існых сусветных рэйтынгаў надаюць увагу навукова-даследчай дзейнасці ўніверсітэтаў, а не іх шматпрофільнасці, у той час як асноўнай мэтай U-Multirank з`яўляецца фарміраванне аб`ектыўнага ўяўлення пра розныя сферы дзейнасці ВНУ, адзначылі ў прэс-службе
База дазваляе абітурыентам, студэнтам і іншым зацікаўленым асобам параўноўваць ВНУ па розных параметрах — працаўладкаванне выпускнікоў, узровень адукацыі і г.д. Даныя фарміруюцца на аснове статыстычных даных, якія падаюць ВНУ, і апытанняў яго студэнтаў.
Цяпер база ўтрымлівае даныя 850 універсітэтаў, больш як 1.000 факультэтаў і 5 тысяч адукацыйных праграм у 70 краінах. Інфармацыя пра ВНУ выбудоўвалася па пяці крытэрыях: выкладанне і паспяховасць, даследаванні, абмен вопытам, міжнародная арыентацыя і рэгіянальнае значэнне.
Прадугледжваецца штогадовая ацэнка розных кірункаў ВНУ, якія будуць вызначацца аргкамітэтам рэйтынгу. Сёлета выдзелены чатыры профілі: Business (эканоміка прадпрыемства, кіраванне, менеджмент), Electrical engineering (інжынерныя спецыяльнасці: электратэхніка, электроніка, інфармацыйныя тэхналогіі), Mechanical engineering (інжынерныя спецыяльнасці: машынабудаванне, прыборабудаванне, механіка) і Physics (фізіка).
У сувязі з гэтым ад БДУ ў рэйтынг трапілі толькі пяць факультэтаў: фізічны, радыёфізікі і камп`ютарных тэхналогій, механіка-матэматычны, эканамічны і міжнародных адносін, ІБМТ і ДІКСТ БДУ. У базу даных аб ВНУ ўнесена больш за 800 статыстычных паказчыкаў, анкетаванне прайшлі 2.092 студэнты.
Анастасія Салановіч,
БелаПАНМінск, 15 траўня 2014
