У 2023 годзе была распрацавана і зацверджана Праграма развіцця нацыянальнай сістэмы забеспячэння якасці адукацыі да 2025 года і на перспектыву да 2030 года. У якасці асноўных вынікаў укаранення гэтай праграмы Вольга Рыбаключава адзначыла стварэнне матывуючых умоў для адораных абітурыентаў, у тым ліку для паступлення ў рэгіянальныя ВНУ.

"У 2024 годзе практычна ў два разы больш адораных і матываваных абітурыентаў паступіла ва ўстановы вышэйшай адукацыі без уступных іспытаў. Больш як у тры разы павялічылася колькасць выпускнікоў Нацыянальнага дзіцячага тэхнапарка, якія сталі студэнтамі ВНУ. Таксама сярод вынікаў - шырокае развіццё ўніверсітэцкіх алімпіяд у рэгіянальных установах вышэйшай адукацыі. У мінулым годзе 21 рэгіянальная ВНУ правяла гэтыя іспыты, і каля 400 абітурыентаў рэалізавалі сваё права паступлення ў гэтыя ж установы адукацыі без уступных экзаменаў", - расказала дырэктар дэпартамента.

У ВНУ на конкурснай аснове таксама створаны цэнтры кампетэнцый. Паводле слоў кіраўніка, такія цэнтры ўжо даволі добра зарэкамендавалі сябе на ўзроўні сярэдняй спецыяльнай адукацыі, у мінулым годзе ахоп навучання ў гэтых цэнтрах на ўзроўні сярэдняй спецыяльнай адукацыі павялічаны прыблізна на 7 працэнтаў.

Акрамя таго, вызначаны асноўныя напрамкі ўдасканалення работы з вучнямі з асаблівасцямі псіхафізічнага развіцця - зацверджана адпаведная канцэпцыя. Яшчэ з вынікаў - распрацоўка і зацвярджэнне метадычных рэкамендацый для ўсіх узроўняў адукацыі аб парадку арганізацыі і правядзення самакантролю за забеспячэннем якасці адукацыі ва ўстановах адукацыі.

"Гэта далёка не поўны пералік рэзультатыўных мерапрыемстваў, праведзеных у сістэме адукацыі ў 2024 годзе. Асноўны наш пасыл - адукацыя павінна быць для эканомікі і грамадства, яна павінна адпавядаць тэндэнцыям бягучага запыту рынку працы, а таксама патрэбнасцям будучай эканомікі", - падкрэсліла Вольга Рыбаключава.

19 лютага 2025, Мінск
БЕЛТА