Фінал рэспубліканскай алімпіяды па тэорыі і практыцы выбарчага працэсу адбыўся сёння ў Мінску. Па выніках адборачных іспытаў з 1878 вучняў 10-11-х класаў устаноў адукацыі, якія зарэгістраваліся ў якасці ўдзельнікаў алімпіяды, у фінал выйшлі 70 старшакласнікаў з усіх рэгіёнаў краіны. Сёння ім трэба было прайсці камп`ютарнае тэставанне, а таксама паказаць свае веды пра выбарчы працэс і праявіць кемлівасць у час настольнай адукацыйнай гульні "Выбар.BY".

"Становіцца традыцыяй штогадовае правядзенне алімпіяды па тэорыі і практыцы выбарчага працэсу для старшакласнікаў. Год таму мы ў сваю практыку ўкаранілі распрацоўку і падпісанне сумесных з Міністэрствам адукацыі планаў па прававой асвеце моладзі. І калі ў мінулым годзе ў такой алімпіядзе прынялі ўдзел 800 чалавек, то ўжо ў бягучым - практычна 2 тыс. дзяўчат, юнакоў, школьнікаў выказалі жаданне праверыць свае веды. Я ўпэўнена, што такія мерапрыемствы для школьнікаў будуць садзейнічаць, безумоўна, развіццю прававых ведаў", - адзначыла Алена Балдоўская.

Паводле яе слоў, ад узроўню правасвядомасці залежыць у тым ліку і наша будучыня, і тыя дзеянні, якія мы робім у сваім жыцці. "Выбары з`яўляюцца таксама важным этапам у развіцці і дзяржаўнасці, і важнай падзеяй для кожнага з нас. Тым больш для моладзі. Нездарма мы гаворым, што моладзь - гэта наша будучыня. Таму гэтыя хлопчыкі і дзяўчынкі, якія сёння паказалі ўжо вельмі высокі ўзровень прававых ведаў у такой спецыфічнай падгаліне права, як выбарчае права, - упэўнена, што гэта патрыёты сваёй краіны, тыя людзі, якія будуць з упэўненасцю прыходзіць на выбарчыя ўчасткі і з упэўненасцю рабіць свой выбар пры галасаванні за таго ці іншага кандыдата", - падкрэсліла сакратар ЦВК.

Алімпіяда арганізавана ЦВК сумесна з Міністэрствам адукацыі, Акадэміяй кіравання пры Прэзідэнце, Акадэміяй адукацыі і накіравана на павышэнне ў вучняў 10-11 класаў узроўню ведаў заканадаўства Рэспублікі Беларусь у галіне выбарчага права і выбарчага працэсу. У бягучым годзе алімпіяда праходзіць у тры этапы. У рамках першага этапа ўдзельнікі мелі магчымасць дыстанцыйна праслухаць лекцыйны адукацыйны курс па пытаннях тэорыі і практыкі выбарчага працэсу. На другім этапе школьнікі прынялі ўдзел у камп`ютарным тэставанні і адказалі на пытанні, падрыхтаваныя арганізатарамі алімпіяды. Трэці этап прайшоў 3 траўня на базе Акадэміі кіравання пры Прэзідэнце.

3 траўня 2024, Мінск
БЕЛТА