Сёлета амаль 130 ССНУ прымуць студэнтаў. На аснове агульнай базавай адукацыі плануецца набраць каля 18 тысяч чалавек. Але не выключана, што іх колькасць будзе меншай. Пра гэта паведаміла галоўны інспектар упраўлення вышэйшай і сярэдняй спецыяльнай адукацыі Мінадукацыі Таццяна Ягорава.
Цягам тыдня пройдзе залічэнне ў сярэднія спецыяльныя навучальныя ўстановы краіны.
13 жніўня — на бюджэтную форму, 16 — на платную. Але ў верасні, магчыма дазалічэнне на вакантныя месцы.
Пры паступленні ў ССНУ пасля дзевяці класаў абітурыенты здаюць два экзамены: беларускую ці рускую мову і прадмет па спецыяльнасці. У гэтым годзе было прапанавана здаваць пісьмовыя іспыты ў форме цэнтралізаванага задання, распрацаванага Рэспубліканскім інстытутам кантролю ведаў. Яны праходзілі не ў форме цэнтралізавнага тэставання, а ў форме кантрольных работ з заданнямі розных узроўняў. Але тыя ССНУ, якія абралі вусную форму, праводзілі іспыты па ранейшых сцэнарах.
Што да лічбаў, то перавагу ў ССНУ аддавалі цэнтралізаваным заданням.
Рускую ці беларускую мову здавалі ў 103 сярэдніх навучальных установах (пісьмова), матэматыку — у 24 (пісьмова) і 60 (вусна), хімію — у 2 (пісьмова) і 6 (вусна), біялогію — у 2 (пісьмова) і 14 (вусна), замежная мова — у 7 (пісьмова) і 5 (вусна), гісторыю Беларусі — у 2 (пісьмова), сусветную гісторыю — у 1 (пісьмова).
Каля 20 тысяч студэнтаў плануюць прыняць у ССНУ на аснове агульнай сярэдняй адукацыі. Яны падаюць адзін сертыфікат ЦТ па рускай ці беларускай мове і здаюць іспыт па спецыяльнасці.
На спецыяльнасці, дзе летась конкурс не перавысіў 1,5 чалавекі на месца, у гэтым годзе залічэнне будзе праходзіць толькі па сярэднім бале атэстату. Але гэта не тычыцца творчых і спартовых спецыяльнасцяў, на якія іспыты будуць здавацца ў любым выпадку.
Каля 200 чалавек з замежных краін выказалі жаданне атрымліваць сярэднюю спецыяльную адукацыю ў Беларусі.
Найперш гэта абітурыенты з Расіі і Украіны. Але прыязджаюць і з Туркменіі, Ізраіля, Грэцыі.
Наша Ніва 10 жнiўня 2010
Кастусь Матушыч 
