У рамках правядзення патрыятычнай акцыі «Урокі мужнасці» Музей ВАВ прадставіць у «Зубраняці» экспазіцыю, якая складаецца з фондавых матэрыялаў, якая пазнаёміць маладое пакаленне з гісторыяй першых дзён вайны на тэрыторыі Беларусі, партызанскага руху, вызвалення і заваёвы перамогі.

«Спецыяльная мультымедыйная праграма пазнаёміць з унікальнымі экспанатамі, якіх няма ў пастаяннай экспазіцыі музея. За кожнай з гэтых рэчаў — гісторыя жыцця і подзвігу герояў Беларусі, якія абаранялі сваю краіну», — распавялі ў музеі.

Таксама будзе прадстаўлена дзейнасць ваенных фотакарэспандэнтаў і кінааператараў. Асобны раздзел экспазіцыі прысвечаны гераічнай барацьбе Марата Казея, Зіны Партновай, Юры Жданко і многіх іншых юных абаронцаў Радзімы. Дзеці былі падпольшчыкамі, змагаліся ў шэрагах партызан, удзельнічалі ў вызваленні Беларусі. Многія з іх загінулі, некаторым пашчасціла дайсці да Берліна і распісацца на сценах Рэйхстага.

Побач з перасоўнай экспазіцыяй будзе працаваць фотазона з ваеннай формай і зброяй.

Звязда, 27 сакавіка 2022