Аляксандр Лукашэнка пацікавіўся, чым выкліканая неабходнасць распрацоўкі і прыняцця такога дакумента. "Мы шмат гадоў працуем па кіраванні радыёчастотным спектрам, быццам бы не было ніякіх пытанняў... Што, няправільна кіравалі, няправільна размяркоўвалі? Хтосьці плаціць — не плаціць? Што такога новага, каб прэзідэнт вяртаўся да гэтага пытання?" — цытуе прэзідэнта яго прэс-служба.

Лукашэнка пацікавіўся, ці можна працягваць працу ў цяперашніх умовах нарматыўна-прававога рэгулявання. "Калі не можам, будзем звяртацца да гэтага пытання і рыхтаваць адпаведны ўказ прэзідэнта", — сказаў ён.

Акрамя таго, кіраўнік дзяржавы пацікавіўся меркаваннем і планамі нядаўна прызначанага міністра з нагоды сітуацыі ў кіраванай ім сферы.

Дакладваючы аб праекце ўказа, Шульган адзначыў, што абсалютная большасць прапанаваных змяненняў выкліканыя неабходнасцю прывядзення юрыдычнай базы ў адпаведнасць з практыкай, каб рашэнні прымаліся больш мабільна.

Лукашэнка дакумент у цэлым ухваліў, але ў яго будуць унесеныя пэўныя змены. У прыватнасці, на Дзяржаўную інспекцыю па электрасувязі Мінсувязі прапануецца ўскласці функцыі па выдачы дазволаў на эксплуатацыю суднавых радыёстанцый з прысваеннем міжнародных пазыўных і іншых апазнавальных сігналаў. Беларусь ў 2016 годзе далучылася да канвенцыі аб Міжнароднай марской арганізацыі і ўзяла на сябе абавязацельствы па выдачы ўсіх неабходных дакументаў для забеспячэння мараплаўства судоў, у тым ліку дазволаў на эксплуатацыю суднавых радыёстанцый.

Згодна з праектам указа ў рамках дэдаларызацыі эканомікі стаўкі, якія прымяняюцца пры разліку памераў платы за вылучэнне і выкарыстанне радыёчастотнага спектру, усталёўваюцца ў беларускіх рублях замест еўра.

У дакуменце таксама ідзе гаворка пра ўдасканаленне працэсаў часовага ўвозу радыёэлектронных сродкаў, якія выкарыстоўваюцца падчас падрыхтоўкі і правядзення мерапрыемстваў па рашэнні прэзідэнта або ўрада.

"У тым ліку гэтыя меры дазволяць ўдзельнікам II Еўрапейскіх гульняў 2019 года, замежным асобам, якія асвятлялі гэтыя спаборніцтвы, гасцям часова ўвозіць і выкарыстоўваць радыёстанцыі без неабходнасці іх рэгістрацыі і ўнясення платы за выкарыстанне спектру", — удакладнілі ў прэс-службе.

Акрамя таго, прапануецца ўсталяваць асноўныя палажэнні міжнародна-прававой абароны частотных прысваенняў. Уносяцца змены і дапаўненні ў некаторыя ўказы, якія тычацца радыёчастотнага спектру, зыходзячы з практыкі іх прымянення.

Аляксей Аляксандраў, БелаПАН
Мінск, 2 кастрычніка 2018