Закон захоўвае асноўныя падыходы да ліцэнзавання, замацаваныя ва ўказе кіраўніка дзяржавы ад 1 верасня 2010 года нумар 450 «Аб ліцэнзаванні асобных відаў дзейнасці», забяспечвае пераемнасць базавых прынцыпаў ліцэнзавання.

У прыватнасці, сістэмна і комплексна рэгулюецца ўся сфера ліцэнзавання, у тым ліку вызначаюцца ліцэнзуемыя віды дзейнасці і ліцэнзуючыя органы, патрабаванні, што прад’яўляюцца да саіскальнікаў ліцэнзій і ліцэнзіятаў, парадак атрымання ліцэнзіі. Канкрэтызуюцца грубыя парушэнні заканадаўства аб ліцэнзаванні, якія з’яўляюцца падставай для спынення ліцэнзіі.

Дадаткова законам прадугледжваецца ліцэнзаванне дзейнасці ў галіне чыгуначнага транспарту ў мэтах рэалізацыі прынятых краінай абавязацельстваў у рамках ЕАЭС.

Замацоўваецца пераход на электроннае ліцэнзаванне праз стварэнне Адзінага лічбавага рэестра ліцэнзій.

Адной з важных навацый з’яўляецца ўвядзенне ліцэнзавання дашкольнай і школьнай адукацыі.

Адукацыйная дзейнасць патрабуе павышанага кантролю з боку дзяржавы, паколькі звязана з фарміраваннем здаровай, ідэалагічна ўстойлівай і рознабакова развітой асобы. Ліцэнзаванне гэтай дзейнасці стане гарантам законнасці і якасці аказваемых паслуг, дасць магчымасць ацаніць арганізацыю адукацыйнага працэсу і не дапусціць з’яўлення ў сферы адукацыі суб’ектаў гаспадарання, якія маюць выключна камерцыйныя мэты на шкоду дзяржаве і асобе.

Нормы аб атрыманні ліцэнзіі дзяржаўнымі і прыватнымі дзіцячымі садамі і школамі ўступяць у сілу адразу пасля афіцыйнага апублікавання закона, астатнія палажэнні — з 1 студзеня 2023 года.

Тэрміны звароту па атрыманне ліцэнзіі будуць вызначацца Міністэрствам адукацыі ў адпаведнасці з зацвярджаемым ім графікам. Ліцэнзаванне ўскладзена на Мінскі гарадскі выканаўчы камітэт, гарадскія (гарадоў абласнога падпарадкавання) і раённыя выканаўчыя камітэты.

Прыняцце закона дасць магчымасць знізіць адміністрацыйную нагрузку на суб’екты гаспадарання, забяспечыць неабходнасць атрымання ліцэнзіі толькі для ажыццяўлення эканамічнай дзейнасці, патэнцыяльна звязанай з пагрозамі нанясення шкоды дзяржаўным або грамадскім інтарэсам, правам і законным інтарэсам грамадзян.

Звязда, 17 кастрычніка 2022