Беларускія пагранічнікі перададуць "Эстафету Перамогі" расійскім калегам на Кургане Дружбы 18 лютага, паведаміў афіцыйны прадстаўнік Полацкага пагранічнага атрада Дзяніс Глебка.
Пераходны сімвал уручаць прадстаўнікі беларускага пагранкамітэта супрацоўнікам пагранічнага ўпраўлення ФСБ па Рэспубліцы Карэлія ў раёне мемарыяльнага комплексу ў Верхнядзвінскім раёне на стыку трох меж – беларускай, расійскай і латвійскай. У гэтым месцы Латвія ў канцы мінулага года пачала будаваць "лінію абароны".
Адзначаецца, што ў мерапрыемстве прымуць удзел кіраўніцтва ДПК, спікер ніжняй палаты беларускага парламента Ігар Сяргеенка, кіраўнік ЦВК Беларусі Ігар Карпенка і іншыя.
За два дні да гэтага полацкія пагранічнікі прымуць эстафету ад Смаргонскай пагранічнай групы, урачыстасці з гэтай нагоды пройдуць у Браславе. У панядзелак, 17 лютага, адбудзецца аўтапрабег па маршруце Полацк – Фарынава – Полацк, затым на Кургане Бяссмерця ў самым старажытным горадзе Беларусі пройдзе ўрачысты мітынг. Пасля канцэртнай праграмы аўтакалона накіруецца ў Верхнядзвінск.
Акцыя "Эстафета Перамогі"
Міжнародная ваенна-патрыятычная акцыя "Эстафета Перамогі" стартавала 2 лютага адначасова ў двух гарадах – у Брэсце і Мурманску. Яна праходзіць па двух маршрутах уздоўж меж краін СНД і прысвечана 80-годдзю Перамогі ў Вялікай Айчыннай вайне. Праект арганізаваны Саветам камандуючых пагранічнымі войскамі Садружнасці.
Акцыя завершыцца 28 мая, у Дзень пагранічніка, на Чырвонай плошчы ў Маскве каля мемарыяла "Могила неизвестного солдата". Эстафета ахопіць дзевяць краін, яе агульны кіламетраж складзе больш за 60 тыс км, у тым ліку па тэрыторыі Беларусі – больш за 3,5 тыс.
