Абарот знешняга гандлю тавараў і паслуг паміж рэгіёнамі Беларусі і Расіі за чатыры месяцы 2024 года склаў 101 млрд беларускіх, або 2,9 трлн расійскіх рублёў, заявіла старшыня Савета Рэспублікі Нацыянальнага сходу Наталля Качанава на XI Форуме рэгіёнаў у Віцебску.

"Насуперак усім санкцыям і нядобразычліўцам, якія разлічвалі на тое, што, увёўшы абмежаванні, мы будзем мець нейкія праблемы. Не, гэта наадварот стала сігналам, можа, нават імпульсам да таго, што мы сталі працаваць эфектыўна, разумеючы, што трэба займацца эканомікай сваіх краін, мець свае тэхналогіі, якія раней набываліся з трэціх краін", - сказала яна на сустрэчы з кіраўнікамі беларускіх і расійскіх рэгіёнаў.

Качанава таксама адзначыла, што за мінулы год узаемны тавараабарот дзвюх краін склаў 286 млрд беларускіх ці больш за 8 трлн расійскіх рублёў.

"Мы бачым, што станоўчая дынаміка захоўваецца. Мы бачым, што сапраўды наша супрацоўніцтва развіваецца эфектыўна, нам ёсць яшчэ над чым працаваць. Але разам з тым тыя вынікі, якія мы маем, ужо вялікія", - канстатавала спікер верхняй палаты беларускага парламента.

Паводле яе слоў, Беларусь сёння супрацоўнічае практычна з усімі рэгіёнамі Расійскай Федэрацыі, а ў дзесятку лідараў, якія імпартавалі тавары з рэспублікі па выніках мінулага года, увайшлі Масква, Санкт-Пецярбург, Маскоўская, Смаленская, Бранская, Ленінградская, Свярдлоўская, Растоўская вобласці, Рэспубліка Татарстан і Краснадарскі край.

Адзінаццаты па ліку Форум рэгіёнаў Беларусі і Расіі праходзіць 27-28 чэрвеня ў Віцебскай вобласці. Упершыню мерапрыемства праводзіцца адразу ў трох гарадах – Віцебску, Полацку і ​​Наваполацку. У Віцебску знаходзіцца дэлегацыя Савета Федэрацыі на чале са старшынёй палаты Валянцінай Мацвіенкай. У рабоце Форуму бяруць удзел прадстаўнікі больш як 50 расійскіх рэгіёнаў і ўсіх абласцей Беларусі. Да падпісання рыхтуецца больш за 250 дакументаў аб супрацоўніцтве рознага ўзроўню.

Віцебск, 28 чэрвеня 2024
Sputnik