Паводле слоў міністра, за мінулы год было рэалізавана 10 домакамплектаў, а за гэты - ужо 38. Прычым яшчэ вельмі шмат нерэалізаваных заявак.

"Ёсць заяўкі на 64 домакамплекты да канца года, і заяўкі прадаўжаюць паступаць. Гэта падштурхоўвае ўдасканальвацца далей, аказваць дадатковыя паслугі. Я ўпэўнены, што за гэты год мы рэалізуем 100 домакамплектаў, і гэта будзе наша перамога", - заявіў Аляксандр Кулік.

Чаму ж у міністэрстве дадзены вынік называюць перамогай? Справа не толькі ў тым, што за год продажы вырастуць у дзесяць разоў. Калі пару гадоў таму Мінлясгас вырашыў заняцца вытворчасцю домакамплектаў, многія не паверылі ў перспектыўнасць гэтага напрамку.

"Скептыкаў тады было больш, чым аптымістаў. Нават многія кіраўнікі нашых лясгасаў гаварылі, што гэта ідэя, калі развіта маналітнае будаўніцтва, з блокаў, з цэглы, наўрад ці будзе ўспрынята. Але, як кажуць, галоўнае было ўвязацца", - падзяліўся міністр.

Цяпер у гандлёвай сетцы Мінлясгаса прадаецца пяць тыпавых домакамплектаў коштам ад Br18 тыс. да Br70 тыс. "Мы вывучаем попыт і пажаданні людзей па ўнутранай планіроўцы, тэрасах, верандах, камплектуючых. Як кажуць, цюнінг і дадатковая камплектацыя", - адзначыў Аляксандр Кулік.

Цяпер на базе лясгасаў створана 25 вытворчасцей па выпуску домакамплектаў. У бліжэйшы час плануецца адкрыць яшчэ 7 цэхаў. Адзіны нюанс - насельніцтву домакамплекты пастаўляюцца ў разабраным выглядзе. Праўда, усе бярвёны пранумараваны, да іх прыкладаецца інструкцыя па зборцы. Але сабраць зруб самастойна не заўсёды лёгка, таму грамадзяне прыцягваюць іншых пабочных падрадчыкаў.

"Мы думалі, ці трэба нам займаць гэту нішу. Напэўна, так. Калі будзе пастаянны попыт, тады ёсць сэнс у лясгасах ствараць брыгаду па зборцы", - дадаў кіраўнік ведамства.

28 жніўня 2024, Мінск
БЕЛТА