Кіраўнік дзяржавы прывітаў усіх расійскіх калег у гасціннай беларускай сталіцы. «З прычыны абставін вы не былі ў нас даволі даўно. У гэтым складзе. А наогул міністр з міністрам часта сустракаюцца. Але вы заўсёды з’яўляецеся для нас жаданымі гасцямі. Перапынак у візітах у Мінск зусім не перашкаджаў нам быць у пастаянным кантакце. Нават заходнія нашы так званыя партнёры вельмі непакоіліся, што мы часам вельмі часта сустракаемся. Мы рэгулярна сустракаліся як у Расійскай Федэрацыі, так і на міжнародных пляцоўках», — сказаў беларускі лідар, звяртаючыся да Уладзіміра Пуціна.
Ён адзначыў, што таксама інтэнсіўна працуюць урады дзвюх краін, шмат сустрэч праходзіць на ўзроўні рэгіёнаў і прадпрыемстваў. Пацвярджэнне таго — стабільны рост гандлю, вырашэнне многіх пытанняў, якія раней перашкаджалі супрацоўніцтву.
«Умацаванне беларуска-расійскіх сувязей стала зразумелым адказам на зменлівую сітуацыю ў свеце, у якой нас пастаянна правяралі і правяраюць на трываласць. Лічу, што, нягледзячы на некаторыя шурпатасці, мы ўсё ж знаходзім эфектыўныя адказы на розныя выклікі і пагрозы», — падкрэсліў Аляксандр Лукашэнка.
Паводле яго слоў, лёсавызначальныя рашэнні аб больш цеснай інтэграцыі Беларусі і Расіі зноў дэманструюць усяму свету, што толькі разам можна пераадолець любыя пандэміі, крызісы або санкцыі.
Цікава, што перагаворы Аляксандра Лукашэнкі і Уладзіміра Пуціна адразу пачаліся з пашыранага складу ў прысутнасці членаў дэлегацый. Пры гэтым лідары краін размясціліся не адзін насупраць аднаго, як гэта звычайна адбываецца ў ходзе такіх перагавораў, а побач. У гэтым асаблівы сімвалізм, падкрэслена дружалюбны і саюзніцкі характар беларуска-расійскіх адносін.
У Беларусь прыбыла прадстаўнічая дэлегацыя высокапастаўленых расійскіх чыноўнікаў. У яе складзе віцэ-прэм’ер Аляксей Авярчук, памочнік Прэзідэнта Расіі Юрый Ушакоў, кіраўнік МЗС Сяргей Лаўроў і міністр абароны Сяргей Шайгу, намеснік кіраўніка Адміністрацыі Прэзідэнта і прэс-сакратар Дзмітрый Пяскоў, міністр энергетыкі Мікалай Шульгінаў, дырэктар Федэральнай службы па ваенна-тэхнічным супрацоўніцтве Дзмітрый Шугаеў, генеральныя дырэктары «Раскосмасу» і «Расатама» Юрый Барысаў і Аляксей Ліхачоў, намеснік міністра фінансаў Аляксей Сазонаў.
З боку беларускага ўрада ў перагаворах удзельнічаюць прэм’ер-міністр Раман Галоўчанка і першы віцэ-прэм’ер Мікалай Снапкоў, кіраўнікі МЗС, Мінабароны, Мінпрама, Міністэрства транспарту і камунікацый, Мінфіна, Мінэнерга, старшыня Дзяржаўнага ваенна-прамысловага камітэта і старшыня Дзяржаўнага мытнага камітэта.
У складзе дэлегацый з абодвух бакоў таксама паслы ў Маскве і Мінску Дзмітрый Крутой і Барыс Грызлоў.
Звязда, 19 снежня 2022
