У ліпені бягучага года на палях міжнароднай прамысловай выстаўкі ІНАПРАМ у Екацярынбургу было падпісана пагадненне паміж урадамі Беларусі і Расіі аб супрацоўніцтве ў галіне развіцця станкаінструментальнай прамысловасці. Подпісы пад дакументам паставілі намеснік прэм`ер-міністра Беларусі Пётр Пархомчык і віцэ-прэм`ер - міністр прамысловасці і гандлю Беларусі Дзяніс Мантураў.

У рамках пагаднення распрацавана праграма мерапрыемстваў (дарожная карта) па развіцці супрацоўніцтва паміж Міністэрствам прамысловасці Беларусі і Міністэрствам прамысловасці і гандлю РФ у галіне станкабудавання. Дарожная карта таксама стала працягам падпісаных дакументаў аб адзінай прамысловай палітыцы і аб узаемным прызнанні тэхналагічных аперацый.

"Сама дарожная карта гэта ўжо больш дэталёвы дакумент, план канкрэтных мерапрыемстваў, які дазволіць развіць важны з пункту гледжання тэхналагічнага суверэнітэта напрамак Саюзнай дзяржавы. У дакуменце ўлічана складанне галіновай карты па размеркаванні кампетэнцый паміж прадпрыемствамі Беларусі і Расіі, у тым ліку ў стварэнні кампанентаў для станочнага абсталявання", - расказаў намеснік міністра прамысловасці Беларусі Аляксандр Яфімаў.

Дакумент прадугледжвае стварэнне спрыяльных умоў для усталявання і падтрымання прамых сувязей і развіцця кааперацыі па рэалізацыі сумесных праектаў паміж вытворцамі станкаінструментальнай прадукцыі дзвюх краін, стварэнне сумесных вытворчасцей станкабудаўнічай прадукцыі, а таксама фармаванне прапаноў па распрацоўцы мер дзяржаўнай падтрымкі вытворцаў станкаінструментальнай прадукцыі Саюзнай дзяржавы.

Міністэрствам прамысловасці Беларусі і Мінпрамгандлем Расіі будуць вызначаны галаўныя арганізацыі, што дазволіць у бліжэйшы час забяспечыць выпуск неабходнага аб`ёму апрацоўчага абсталявання.

"Тэхналагічны суверэнітэт любой развітой дзяржавы вызначаецца развіццём станкабудаўнічай галіны. Гэта вельмі важны напрамак, паколькі ён інавацыйны, тэхнічна і тэхналагічна перадавы. Менавіта гэтай галіне мы цяпер удзяляем самую пільную ўвагу, каб у бліжэйшы час паспрабаваць выйсці на выпуск поўнасцю лакалізаваных станкоў у рамках Саюзнай дзяржавы", - сказаў Аляксандр Яфімаў.

Цяпер ужо ў рамках дарожнай карты пачата рэалізацыя двух інвестыцыйных праектаў. "Два нашы прадпрыемствы атрымалі ўзгадненне пашпартоў праектаў з расійскім бокам. ААТ "СтанкаГомель" створыць шматфункцыянальнае апрацоўчае абсталяванне. Праект ужо крэдытуецца Расіяй у рамках міжурадавага пагаднення. У бліжэйшы час мы завершым унутрыдзяржаўнае ўзгадненне па яшчэ адным узгодненым з Расіяй праекце ў ААТ "ВІСТАН". Гэта будзе інавацыйнае зубаапрацоўчае абсталяванне, уся лінейка гэтага абсталявання будзе вырабляцца на віцебскім "ВІСТАНе". Гэтыя станкі патрэбны для вытворчасці дэталей з зубчастымі элементамі, якія неабходны для машын, трансмісій, каробак перадач і інш. Гэта вельмі важны праект з пункту гледжання выпуску ў далейшым уласнай кампанентнай базы для машынабудаўнічых канвеерных прадпрыемстваў", - растлумачыў намеснік міністра.

Паводле яго слоў, вынікам рэалізацыі дарожнай карты стане распрацоўка навукова-тэхнічнай праграмы, якая дасць магчымасць прафінансаваць з саюзнага бюджэту навукова-даследчыя, доследна-канструктарскія работы як па стварэнні новых вырабаў, так і кампанентаў для вытворчасці станкоў.

"Дакумент прадугледжвае фармаванне прапаноў для ўключэння ў праграму Саюзнай дзяржавы, рэалізацыю сумесных праектаў па вытворчасці новых відаў прадукцыі, пашырэнне супрацоўніцтва паміж арганізацыямі ў пастаўках абсталявання", - цытуе Міхаіла Іванова прэс-служба Мінпрамгандлю.

Міністэрства прамысловасці Беларусі разам з калегамі з Мінпрамгандлю Расійскай Федэрацыі з мінулага года актыўна развівае напрамак станкаінструментальнай прамысловасці, гэтаму садзейнічае вялікая праграма па рэалізацыі шэрага інвестыцыйных праектаў.

22 верасня 2023, Мінск
БЕЛТА