Пракуратура Віцебскай вобласці накіравала ў суд Першамайскага раёна Віцебска крымінальную справу па абвінавачванні двух мясцовых жыхароў у незаконным абароце асабліва небяспечных псіхатропных рэчываў у складзе арганізаванай групы.

Фігурантамі крымінальнай справы сталі два трафарэтчыкі. Паводле матэрыялаў, мужчыны ўступілі ў арганізаваную злачынную групу ў жніўні 2023. Ад куратараў яны атрымлівалі ўказанні па рэкламных надпісах з адрасамі і спасылкамі на сайты, якія затым наносілі на будынкі і аб’екты ў грамадскіх месцах, выкарыстоўваючы балончыкі з фарбамі.

Крымінальная справа знаходзілася ў вытворчасці УСК па Віцебскай вобласці. У пракуратуры рэгіёну прыйшлі да высновы, што абвінавачванні абгрунтаваныя, а абставіны злачынства даследаваныя аб’ектыўна. У наглядным ведамстве пагадзіліся з кваліфікацыяй учыненага па ч. 4 арт. 328 КК.

Абвінавачаныя застаюцца пад вартай.

Звязда, 18 кастрычніка 2024