Паводле вынікаў працы ў студзені—верасні 2011 года ў дзвюх галінах прамысловасці адзначаны спад вытворчасці, паведамляе Нацыянальны статыстычны камітэт. Зніжэнне аб`ёмаў вытворчасці адбылося ў здабычы паліўна-энергетычных карысных выкапняў (на 0,5%) і ў сферы вытворчасці і размеркавання электраэнергіі, газу і вады (на 3,5%).
У астатніх галінах прамысловасці, паведамляе Белстат, за гэты перыяд адзначаны рост: здабыча карысных выкапняў, акрамя паліўна-энергетычных, — на 5,6%; вытворчасць харчовых прадуктаў — на 6,7%; тэкстыльная і швейная вытворчасць — на 6%; вытворчасць скуры і абутку — на 7,9%; апрацоўка драўніны і вытворчасць вырабаў з дрэва — на 9,6%; цэлюлозна-папяровая вытворчасць і выдавецкая дзейнасць — на 8%; вытворчасць коксу, нафтапрадуктаў і ядзерных матэрыялаў — на 21,1%; фармацэўтычная прамысловасць — на 18%; вытворчасць гумавых і пластмасавых вырабаў — на 13,6%; металургічная вытворчасць і вытворчасць гатовых металічных вырабаў — на 10,8%; вытворчасць машын і абсталявання — на 13,9%; вытворчасць транспартных сродкаў і абсталявання — на 32,7%.
У цэлым па прамысловасці за студзень—верасень аб`ём вытворчасці вырас на 10,6% у параўнанні з такім жа леташнім перыядам і склаў 206 трлн. 694,1 млрд. рублёў у наяўных цэнах. Паводле прагнозу сацыяльна-эканамічнага развіцця на 2011 год, аб`ём прамысловай прадукцыі павінен вырасці на 9—9,5%.
Марына Носава,
БелаПАНМінск, 16 кастрычніка 2011
