"Баюся, што гэты глабальны крызіс, пра які зараз так шмат гавораць, можа прыйсці і да нас", — заявіў Аляксандр Лукашэнка 11 кастрычніка на сустрэчы з губернатарам Наўгародскай вобласці Расіі Сяргеем Міціным.
"Думаю, што калі мы з Расіяй будзем разам, мы з мінімальнымі стратамі пераадолеем гэты крызіс. У нас ёсць што прапанаваць Расіі, у нас вялікая патрэба ў расійскіх рэсурсах. І калі мы сапраўды створым роўныя ўмовы, як гэта піша прэм`ер-міністр Расіі ў сваім артыкуле аб інтэграцыі, вы можаце лічыць беларусаў навечна сваімі людзьмі", — прыводзіць прэс-служба прэзідэнта словы Лукашэнкі.
У Беларусі і Расіі зараз "добры дыялог", лічыць кіраўнік дзяржавы. "Няпраўда, што гэта напярэдадні прэзідэнцкіх выбараў у Расіі і парламенцкіх выбараў у Беларусі, якія адбудуцца ў наступным годзе. Тут няма ніякай палітычнай кан`юнктуры, — падкрэсліў ён. — Мы даўно разумеем і ведаем, што такое Расія для Беларусі. Напэўна, і расіяне сёння пераканаліся наверсе, што такое Беларусь для Расіі. Павінен быў прайсці пэўны перыяд для таго, каб Расія ўбачыла сапраўдных сяброў, сапраўдных прыліпалаў і сапраўдных ворагаў".
Лукашэнка адзначыў, што для Беларусі і Расіі "вельмі важна быць разам". "Мы гатовы прапанаваць Расіі ўсё ў плане сельскагаспадарчай прадукцыі. Мы гатовы калі не на 100%, то вялікую долю яшчэ дабавіць на расійскім рынку", — сказаў ён.
Таццяна Каравянкова,
БелаПАНМінск, 11 кастрычніка 2011
