У цырымоніі перапахавання таксама прынялі ўдзел генеральны пракурор Беларусі Андрэй Швед і Надзвычайны і Паўнамоцны Пасол Ізраіля ў Беларусі Алекс Гольдман-Шайман. Паніхіду па загінулых адслужылі прадстаўнікі трох рэлігійных канфесій Беларусі. Пасля гэтага быў адкрыты памятны камень, да якога прысутныя ўсклалі кветкі.

"Роўна 81 год таму на гэтым месцы адбылася страшная трагедыя. Тут былі расстраляны больш за тысячу мірных, ні ў чым не вінаватых грамадзян. 81 год - гэта цэлае жыццё для чалавека, а для гісторыі толькі імгненне. Мы знаходзімся на лагойскай зямлі. Акрамя гэтага месца, тут ёсць Хатынь і Дальва - тыя месцы, якія вядомы кожнаму беларусу, дзе ў гады вайны расстрэльвалі, вешалі і спальвалі жывымі нашых людзей", - сказаў Аляксандр Турчын.

Старшыня Мінаблвыканкама падкрэсліў, што беларусы - міралюбная нацыя і не хочуць вайны: "Але мы не маем права дапусціць паўтарэння таго, што адбывалася на нашай зямлі 80 гадоў таму. Дзясяткамі войнаў і канфліктаў, а таксама мільёнамі забітых за сваю шматгадовую гісторыю Беларусь выпакутавала, каб Вялікая Айчынная вайна стала апошнім канфліктам на тэрыторыі нашай краіны".

Аляксандр Турчын заявіў, што сёння нашчадкі тых, хто ўчыняў гэтыя зверствы на тэрыторыі Беларусі, не супакойваюцца і прымяняюць новыя формы барацьбы з беларускай дзяржавай. "Эканамічнымі санкцыямі і іншымі абмежаваннямі яны хочуць дабіцца разбурэння нашай краіны. Я лічу, што, увекавечваючы памяць забітых тут, мы даказваем усяму свету, што нас не зламаць. Пакуль у нас ёсць памяць аб гэтым, мы будзем моцныя, цвёрдыя і паспяховыя як незалежная дзяржава. Вечная памяць бязвінна забітым людзям тут і на ўсёй тэрыторыі нашай краіны", - рэзюмаваў старшыня Мінаблвыканкама.

30 жніўня 2022, Мінск
БЕЛТА