— З гродзенскім старастам Антоніем Тызенгаўзам, які жыў у ХVIII стагоддзі, звязана адкрыццё ў Гродне першага тэатра і тэатральнай школы. Зараз наша школа мастацтва носіць яго імя, — паведаміла намеснік дырэктара па выхаваўчай рабоце гэтай установы Вольга Сілюк. — А ў першым фестывалі-конкурсе мы імкнемся нагадаць аб тым, як гэта адбывалася і, магчыма, адрадзіць гэту традыцыю і надалей.

Тэатральнае свята аб’яднае больш за сто аматараў дзіцячага і маладзёжнага тэатральнага мастацтва. Юныя артысты выступяць у намінацыях «Мастацкае слова» і «Тэатральнае прадстаўленне». Удзельнікі будуць чытаць маналогі, паказваць урыўкі са спектакляў, літаратурна-музычныя і пластычныя кампазіцыі. 

— Наша мэта — падтрымка творча адораных дзяцей, развіццё іх здольнасцяў, павышэнне ўзроўню тэатральнага майстэрства, а таксама стымуляванне творчай ініцятывы педагагічных работнікаў і кіраўнікоў тэатральных калектываў, — зазначыла Вольга Сілюк.

Ацэньваць конкурс будуць вядучыя артысты гродзенскіх тэатраў і работнікі культурных устаноў. Конкурсны паказ пройдзе 26 сакавіка. Ёсць намер праводзіць фестываль раз у два гады якраз напярэдадні Міжнароднага дня тэатра, які адзначаецца 27 сакавіка. 

Маргарыта Ушкевіч
Звязда, 25 сакавіка 2022