Беларусь спрабуюць уцягнуць у спецыяльную ваенную аперацыю на ўкраінскай тэрыторыі, заявіў кіраўнік дзяржавы ў Палацы Незалежнасці падчас нарады з кіраўніцтвам КДБ.
"Сведчаннем таму з`яўляецца літаральна два дні таму назад ноччу пуск чарговы на тэрыторыю нашай Беларусі - удар па нашай тэрыторыі - ракетай "Точка-У", якую мы паспяхова з расіянамі перахапілі і знішчылі над Прыпяццю. Дзесьці там каля рэчкі валяецца", - запэўніў Аляксандр Лукашэнка.
Паводле яго слоў, усе каму цікава, могуць схадзіць і бліжэй яе разгледзець. Бо гэтае месца не закрытае, а інфармацыя не фэйк. Проста беларускі бок першапачаткова вырашыў спачатку ва ўсім разабрацца.
"Што гэта такое? Яны што, адной ракетай хочуць разбамбіць Беларусь? Ды не атрымаецца. Гэта ракета проста не даляціць да нас. Але навошта гэта робіцца?" - задаўся рытарычным пытаннем беларускі лідэр. Пасля чаго выказаў меркаванне, што такім чынам спрабуюць выклікаць рэакцыю Беларусі ў адказ.
"Але мы не такія прасцячкі. Мы калі адкажам, то адкажам прыстойна ўжо. Што адчуюць усе. Пакуль трываем", - цытуе прэзідэнта прэс-служба.
Беларусь абараняе Расію ад удару ў спіну
Аляксандр Лукашэнка чарговы раз заявіў, што беларускі бок не збіраецца ўвязвацца ў спецыяльную ваенную аперацыю, якую праводзіць расійскае войска на ўкраінскай тэрыторыі. Бо ў гэтым няма ніякай патрэбы.
"Ну, падумайце, што мы можам там Расіі дадаць? Што тычыцца асабовага складу, там дастаткова сваіх воінаў. Мы нешта можам Расіі з пункту гледжання ўзбраенняў дадаць? Ды не. Мы гэта ўсё закупляем у Расійскай Федэрацыі. У іх гэта ўсё ёсць , і нават лепш. Таму нам там рабіць няма чаго. І нас туды не клічуць", - запэўніў ён.
Праўда, потым прызнаў, што беларускія вайскоўцы выконваюць уласныя задачы на сваёй тэрыторыі ў сувязі з гэтай спецыяльнай вайсковай аперацыяй.
"Наша задача - гэта вельмі важна ў любым баі, не толькі ў вайне - папярэдзіць напад з тылу на войскі, якія рухаюцца. Расійскія. Вось гэтага мы ніколі не павінны дапусціць. Ніколі! Гэта будзе падобна здрадзе", - падкрэсліў кіраўнік дзяржавы.
У завяршэнне ён звярнуў увагу ўдзельнікаў сходу, што рэспубліка гэтым і займаецца, таму што трэба абараняць свае межы, як на захадзе, паўночным захадзе, так ужо і на поўдні.
