Урочышча Пяскі ў Полацку — месца спачынку дзясяткаў тысяч чалавек: ваеннапалонных салдат Чырвонай Арміі, партызан, патрыётаў і мірных жыхароў, схопленых акупантамі. Прысвечаная гэтаму трагічнаму месцы кніга, якая выйшла другім выданнем, дапоўнена новымі звесткамі. Акрамя апісання размешчанага тут мемарыяльнага комплексу памяці ахвяр фашызму, у ёй утрымліваюцца ўспаміны ваеннапалонных з лагераў, якія размяшчаліся паблізу Полацка.

«У 2012 годзе выйшла першае выданне кнігі. З тых часоў з’явіліся новыя дадзеныя з Нацыянальнага архіва Беларусі, а таксама архіваў Расіі і Германіі. Гісторыі палонных, якія беглі з лагера, прарваліся да сваіх і пазней удзельнічалі ў баях за Радзіму, запісы з асабістых архіваў былых вязняў — усё гэта дапаўняе кнігу цяпер. У дадатку да яе пералічаныя імёны людзей і назвы арганізацый, якія ўносілі ахвяраванні на будаўніцтва мемарыяльнага комплексу „Урочышча Пяскі“. Я лічу, што яны таксама пакінулі свой след у гісторыі, зрабіўшы добрую справу. І яшчэ не варта забываць, што мемарыяльны комплекс з’яўляецца міжнародным праектам, у якім удзельнічалі жыхары гарадоў-пабрацімаў Полацка — Фрыдрыхсхафена, Электрасталі. Можна сказаць, што гэта агульны боль, які аб’ядноўвае розныя народы гісторыя, якую трэба памятаць усім», — адзначыў аўтар кнігі Сяргей Капыл.

Ён дадаў, што праца над кнігай будзе працягвацца. Знойдзеная ў архівах Германіі аэрафотаздымка наваколляў Полацка дае здагадку аб новых масавых месцах пахавання як раз насупраць мемарыяльнага комплексу — на іншым беразе Палоты. Ва ўрочышчы былі выяўленыя фрагменты абмундзіравання італьянскіх салдат, і іх удзел у баявых дзеяннях на тэрыторыі Полацкай зямлі таксама можа стаць новым аб’ектам для вывучэння.

«Гэта не проста актуальнае ў гэты Год гістарычнай памяці дакументальны праца, гэта вялікая частка майго жыцця. Мне хочацца данесці да чытачоў, што вайна не нясе ў сабе нічога добрага, а толькі боль і пакуты», — падзяліўся Сяргей Капыл.

Звязда, 11 сакавіка 2022